བོད་རིགས་ཚོགས་པ།

ཧྥ་རན་སིའི་བོད་རིགས་ཚོགས་པའི་ ༢༠༠༩ ནས ༢༠༡༢ ལས་བསྡོམས་སྙན་ཐོ།

2012-05-11T22:23:51Z

༄༅། སྤྱི་ལོ ༢༠༠༩ ནས ༢༠༡༢ ་བར་དུ་སྐབས་འདིའི་ཧྥ་རན་སིའི་བོད་རིགས་ཚོགས་པའི་རྒྱུན་ལས་ལྷན་ཚོགས་ཀྱིས་དབུ་ཁྲིད་འོག་ལས་དོན་སྣ་རྒུ་སྒྲུབས་ཡོད་པའི་ཁྲོད་ནས་འདིར་ཁག་གཅིག་ལས་བསྡོམས་ཀྱི་སྙན་ཞུ་ཚུལ་དུ་སྤྱན་འབུལ་ཞུ་རྒྱུ།

༡ ཧྥ་རན་སིའི་བོད་རིགས་ཚོགས་པ་དང་བོར་འཛུགས་དགོས་པའི་དམིགས་ཡུལ་གཙོ་བོ་ནི་ཡུལ་ལུང་འདིར་གནས་སྡོད་བྱེད་མཁན་བོད་རིགས་སྤུན་ཟླ་ཚོ་གཅིག་སྒྲིལ་བྱས་ཏེ་ཧྥ་རན་སིའི་སྤྱི་ཚོགས་ཁྲོད་དུ་བོད་རྒྱལ་ཁབ་དང་མི་རིགས་ཀྱི་ངོ་བོ་དང་ཆོས་དང་རིག་གཞུང་བཅས་ངོ་སྤྲོད་དང་ཁྱབ་སྤེལ་བྱ་རྒྱུ་ཡིན་ཅེས་ཚོགས་པའི་སྒྲིག་གཞིར་འཁོད་ཡོད་པ་བཞིན་ཏུ་ལོ་རེར་ཉིན་གཉིས་རིང་བོད་ཀྱི་རིག་གཞུང་འགྲེམས་སྟོན་གྱི་ལས་འགུལ་ཞིག་སྤྱི་ལོ་ ༢༠༠༩ ནས་གསར་གཏོད་བྱས་ཏེ་(La salon de la Culture tibétaine) ༢༠༡༡ བར་དུ་མི་ཚོགས་སྟོང་ཕྲག་ལྷག་འདུས་ཐུབ་པའི་བོད་ཀྱི་རིག་གཞུང་འགྲེམས་སྟོན་གྱི་ལས་འགུལ་ཆགས་ཡོད།

༢ དཔལ་ཡོན་སློབ་གྲའི་སྐོར།

བོད་རིགས་ཚོགས་པའི་རྒྱུན་ལས་འགན་བཞེས་ཏེ་ཕ་རི་སིའི་རྫོང་ཁག་ ༡༡ གི་སྤྱི་ཁྱབ་པ་སྐུ་ཞབས་པ་ཐི་རེག་བུ་ལོ་ཤེར་མཆོག་གི་སར་ནས་འཛིན་ཁང་ཞིག་རིན་མེད་ཀྱི་སྒོ་ནས་གཡར་བ་དང་། ད་ཕན་ལོ་གསུམ་རིང་བེད་སྤྱོད་བྱས་དང་བྱ་མུས་རེད། དེ་ནི་གཙོ་བོ་ཧྥ་རན་སིར་འཚར་ལོངས་བྱེད་བཞིན་པའི་བོད་ཕྲུག་ཚོའི་ཆེད་དུ་བོད་ཀྱི་དཔལ་ཡོན་སློབ་གྲའི་ཅེས་རེས་གཟའ་ཉི་མའི་བོད་ཡིག་འཛིན་གྲ་ཞིག ༢༠༠༩ ལོའི་ནས་མགོ་བཙུགས་ཏེ་ལོ་ངོ་གསུམ་ལྷག་ཕྱིན། འཛིན་རིམ་ཁག་གསུམ་ཙམ་དང་སློབ་ཕྲུག་ཁྱོན་བསྡོམས་ ༤༦ བཅས་ཡོད། འདི་ད་དུང་ཡང་མུས་མཐུད་དེ་ཡར་རྒྱས་གཏང་དགོས་པའི་ལས་ཀ་ཞིག་རེད།

༣ འདས་པའི་ལོ ༩ ལྷག་གི་རིང་བོད་རིགས་ཚོགས་པས་བསགས་པའི་སྤྱི་དངུལ་དེ་ཁང་ཀླ་ཆེད་གང་བྱུང་འགྲོ་སོང་གཏང་མི་དགོས་པ་བྱས་ཏེ་ཚོགས་པའི་ལས་འགུལ་གང་མང་ཞིག་ཁང་བ་རིན་མེད་འཐོབ་ཐབས་བྱས་ཏེ་ལས་འགུལ་མང་ཐག་ཆོད་ཞིག་སྤེལ་བ་ཡིན། དཔེར་ན་སན་འགུ་རན་ཤན་གྲོང་ཁྱེར་སྤྱི་ཁྱབ་དང་འབྲེལ་བ་བཟུང་སྟེ་ཚོགས་འདུ་མང་བོའི་རིན་མེད་ཀྱིས་སྒོ་ནས་བསྐོངས་ཐུབ་ཡོད།

༤ སྤྱི་ལོ་ ༢༠༡༠ ལོའི་ཟླ་བ་ ༤ བའི་ཚེས ༡༥ ཉིན་ཞོགས་ཁའི་སྔ་མོར་བོད་ཁམས་དགའ་སྐྱེ་རྒུ་མདོར་ས་ཡོམ་གྱི་གོད་ཆག་ཆེན་པོ་ཞིག་བྱུང་སྟེ་རང་རིགས་བོད་མི་སྟོང་ཕྲག་ལས་བརྒལ་བའི་འདས་གྲོངས་ཕྱིན། དེ་སྐབས་ཧྥ་རན་སིའི་བོད་རིགས་ཚོགས་པས་མ་བསྐུལ་དང་བླངས་ཀྱིས་འགན་བཞེས་ཏེ་ཞལ་འདེབས་སློང་བའི་ལས་འགུལ་ཞིག་སྤེལ་ཡོད། མཐའ་མར་ཡུ་སྒོར་ཉིས་ཁྲི་ཉིས་སྟོང་བཞི་བརྒྱ་བརྒྱད་ཅུ་གྱ་གསུམ་ ༢༢༤༨༣ ཧྥ་རན་སིའི་བཅར་བཞུགས་རང་གཞུང་སྐུ་ཚབ་དོན་གཅོད་ལས་ཁུངས་སུ་ཕུལ་ཡོད་པས་བཞུགས་སྒར་རྡ་སའི་བོད་མིའི་སྒྲིག་འཛུགས་ཀྱིས་འབྲེལ་ཡོད་ལ་འཕྲོད་ཐབས་བྱོས་བཅས་ཞུས།

༥ ཆབ་སྲིད་དང་བོད་དོན་དྲིལ་བསྒྲགས་ཀྱི་ལས་འགུལ་ཁག་ནི་ཧྥ་རན་སིའི་བོད་རིགས་ཚོགས་པའི་མཚན་ཐོག་ནས་ཚོགས་གཙོས་བོད་དོན་དང་འབྲེལ་བའི་ཧྥ་རན་སིའི་གསར་འགྱུར་བརྒྱུད་ལམ་ཁག བརྙན་འཕྲིན་དང་རླུང་འཕྲིན་ཚན་པ་སོ་སོར་བོད་དོན་ངོ་སྤྲོད་ཀྱི་གཏམ་བཤད་དང་བགྲོ་གླེང་ཁག་ལ་དུས་དང་རྣམ་པ་ཀུན་ཏུ་གང་ཐུབ་མཉམ་ཞུགས་བྱས་ཡོད།

ཧྥ་རན་སིའི་གྲོས་ཚོགས་གོང་འོག་གི་བོད་དོན་རྒྱབ་སྐྱོར་གྲོས་ཚོགས་ཀྱི་འཐུས་མི་ཁག་འབྲེལ་བ་དམ་ཟབ་བྱས་ཡོད། བོད་དོན་རྒྱབ་སྐྱོར་ཚོགས་པ་ཁག་གི་ལས་འགུལ་དང་ཚོགས་འདུར་ཐེངས་མང་རིང་ལ་མཉམ་ཞུགས་གང་ཐུབ་བྱས་ཡོད། ཨེ་ཤཱ་ཡི་རྒྱལ་ཁབ་ཁག་ནས་ཆད་པའི་མི་རིགས་འདྲ་མིན་དང་མཉམ་སྦྲེལ་བྱས་ཏེ་ལོ་རེར་རྒྱལ་སྤྱིའི་ཡོངས་ཁྱབ་འགྲོ་བ་མིའི་ཐོབ་ཐང་གི་ཉིན་མོ་ཐུན་མོང་གིས་སྲུང་གཙི་བྱས་དང་བྱེད་མུས་ཡིན།

བོད་རིགས་ཚོགས་པའི་འགོ་ཁྲིད་དེ་རྒྱ་རིགས་མང་གཙོའི་དོན་གཉེར་བ་ཚོ་དང་འབྲེལ་བ་དམ་ཟབ་བྱས་ཏེ་བོད་དོན་དང་འབྲེལ་བའི་ལས་འགུལ་སྤེལ་སྐབས་ཁོང་ཚོ་གང་མང་ཞིག་གིས་ང་ཚོའི་ལས་འགུལ་ནང་མཉམ་ཞུགས་བྱས་ཡོད། རང་གཞུང་གི་དབུས་མའི་ལམ་གྱི་སྲིད་བྱུས་དགོངས་དོན་དག་རྒྱ་རིགས་ཚོར་གསལ་བཤད་དང་ཕན་ཚུན་བསམ་ཚུལ་བརྗེ་ལེན་ཐེངས་མང་བྱས།

༦ ཧྥ་རན་སིའི་བོད་རིགས་ཚོགས་པས་འདས་པའི་ལོ་མང་རིང་ལ TCV Select སློབ་མ་གཉིས་ལ་ལོ་རེར་ཡུ་སྒོར་ ༡༠༠༠ སློབ་ཡོན་གྱི་སྦྱིན་བདག་བྱས་ཡོད། བོད་རིགས་ཚོགས་པས་ཧྥ་རན་སིའི་ལྷོ་ཕྱོགས་སུ་གྲོང་རྡལ་ཁས་རེས་crest་རྫོང་དཔོན་སྐུ་ཞབས Herve MARITON མཆོག་ལ་འབྲེལ་བ་བྱས་རྗེས་ཁོང་གིས་་བོད་རིགས་སློབ་མ་གཉིས་ལ་ལོ་གཉིས་རིང་གི་སློབ་ཡོན་གནང་རྒྱུ་ཞལ་བཞེས་ཐོབ་ཏེ་སློབ་མ་གཉིས་དེར་སློང་སྦྱོང་རུ་བཏང་ཟིན།

༧ ཧྥ་རན་སིའི་བོད་རིགས་ཚོགས་པས་འགོ་ཁྲིད་འོག་ཡུ་རོབ་བོད་རིགས་ཚོགས་པ་རྒྱལ་ཁབ་ཁག་ ༡༢ ནས་ཕེབས་པའི་འཐུས་མི་ ༦༠ ལྷག་སྤྱི་ལོ ༢༠༡༠ ཟླ་བ ༡༠ ཚེས་ ༡༧ ནས་ཉིན་གཉིས་རིང་ཡུ་རོབ་བོད་རིགས་མི་མང་ཚོགས་ཆེན་ཐེངས་གཉིས་པ་དེ་ཚོགས་འདུར་བསྐོངས་ཡོད། དེའི་སྐབས་ཀྱི་འགྲོ་སོང་གི་ལྷག་མ་ཡུ་སྒོར ༧༦༧༥་༤༢ བཅས་བོད་རིགས་ཚོགས་པའི་དངུལ་ཁང་ནང་དུ་ཟུར་དུ་བཞག་ཡོད།

༨ ཧྥ་རན་སིའི་བོད་རིགས་ཚོགས་པའི་གོ་སྒྲིག་འོག་ཏུ་སྤྱི་ལོ་ ༢༠༠༩ ནས་ ༢༠༡༢ བར་དུ་རྔམ་སྟོན་ཁྲོམ་སྐོར་གྱི་ལས་འགུལ་མང་ཐག་ཆོད་སྤེལ་ཡོད། ༧ གོང་ས་མཆོག་གི་སྐུ་ཡི་འཁྲུངས་སྐར་དུས་ཆེན་དང་མང་གཙོ་དུས་ཆེན་དེ་བཞིན་ནང་ཆོས་ངོ་སྤྲོད་ཀྱི་ལས་འགུལ་སོགས་གང་ཐུབ་བྱས་ཟིན།

༩ བོད་རིགས་ཚོགས་པའི་ཟློས་གར་ཧྥ་རན་སིའི་ས་ཁུལ་ཁ་ཤས་སུ་རིག་གཞུང་ཁྲབ་སྟོན་སོགས་བྱེད་ཐུབ་ཡོད། སྤྱི་ལོ་ ༢༠༡༠ ཟླ་ ༡༡ ཚེས ༦ ཉིན་ཕ་རི་སིའི་རྫོང་ཁག་ ༡༡ གི་ཚོགས་ཁང་ཆེན་མོའི་ནང་དུ་བོད་དང་གདུང་སེམས་མཉམ་བསྐྱེད་ཀྱི་ཉི་མ་ཞིག་སྲུང་གཙི་བྱ་ཐུབ་ཡོད།

༡༠ ཚོགས་གཙོ་ཟུར་བས་ ༢༠༡༡ ལོའི་ཟླ ༢ ཚེས་ ༢༡ ཉིན་བཞུགས་སྒར་དུ་ངོ་བཅར་ཐོག་ ༧ གོང་ས་མཆོག་གི་དྲུང་དུ་གཟིམ་ཆུང་མཇལ་ཁ་ཞུས་ཏེ་མགོན་པོ་གང་ཉིད་ཧྥ་རན་སིའི་བོད་རིགས་ཚོགས་པས་གདན་འདྲེན་གྱིས་ཧྥ་རན་སིར་ཆིབས་བསྒྱུར་གནང་སྟེ་མང་ཚོགས་སུ་ཉིན་ཤས་རིང་ནང་ཆོས་ངོ་སྤྲོད་ཀྱི་གསུང་ཆོས་དང་དེ་བཞིན་རྒྱ་ཆེ་བའི་མང་ཚོགས་སུ་དེང་དུས་སྤྱི་ཚོགས་ཀྱི་བདེ་སྡུག་དང་འབྲེལ་བའི་བཀའ་སློབ་བཅས་གསོལ་འདེབས་ཞུས་འབྲས་སུ ༧ གོང་ས་མཆོག་གི་བསྐལ་བཟང་གི་ཞལ་བཞེས་ཐོབ་ཡོད་པས་མགོན་པོ་གང་ཉིད་གདན་ཞུ་དང་འབྲེལ་བའི་ལས་འཆར་དེ་བོད་རིགས་ཚོགས་པའི་རྒྱུན་ལས་གསར་བ་ཚོས་མུས་མཐུད་དེ་འཇུག་སྐྱོང་དགོས།

ཧྥ་རན་སིའི་བོད་རིགས་ཚོགས་པའི་ལས་ཁུངས་ནས ༢༠༡༢ ཟླ ༥ ཚེས ༡༠ བྲིས།།

༄༅། །ྋགོང་ས་མཆོག་གིས་རྒྱ་ནག་སྲིད་གཞུང་ལ་ཛ་དྲག་གི་འབོད་སྐུལ་མཛད་པ།

2011-04-18T14:19:59Z

༄༅། །ད་ལམ་བོད་བྱང་ཤར་ཨ་མདོ་རྔ་པ་ཁུལ་གྱི་ཀིརྟིའི་དགོན་པར་དྲག་ཤུགས་ཤིན་ཏུ་ཆེ་བའི་རྒྱ་ནག་གཞུང་གི་དམག་དཔུང་གིས་ས་གནས་བོད་རིགས་མི་མང་ལ་ཆེས་ཛ་དྲག་གི་སྒོ་ནས་དྲག་གནོན་དང། གྲྭ་པ་ཉིས་སྟོང་ལྔ་བརྒྱ་ལྷག་ཡོད་པའི་ཀིརྟིའི་དགོན་པ་ཡོངས་སུ་དྲག་ཆས་དམག་དཔུང་གིས་མཐའ་བསྐོར་ཏེ་བཟའ་ཅ་དང་གཞན་རྒྱུན་ལྡན་དགོས་མཁོའི་རིགས་དགོན་པའི་ནང་འབྱོར་ཐུབ་ཀྱི་མེད།

དེ་ལྟར་ཀིརྟི་དགོན་པ་དྲག་ཆས་དམག་དཔུང་གིས་མཐའ་བསྐོར་ཏེ་གྲྭ་པ་མང་པོ་དགོན་པའི་ནང་བཀག་སྐྱིལ་བྱས་པར་། འབྲེལ་ཡོད་སེར་སྐྱ་མི་མང་ལ་སེམས་ཚབས་དང་འཇིགས་སྣང་ཆེན་པོ་བཟོ་བཞིན་ཡོད། བོད་མི་ཚོས་དགེ་འདུན་པ་མང་པོ་འཛིན་བཟུང་བྱས་པར་དོགས་ཏེ་གཞུང་ལམ་དང་སྲང་ལམ་དུ་ཐོན་ནས་རྒྱའི་དམག་མིའི་སྣུམ་འཁོར་རིགས་དགོན་པའི་ཕྱི་ནང་དུ་འགྲོ་འོང་བཅུག་གི་མེད།

ཟླ་ ༣ ཚེས་ ༡༦ ནས་བཟུང་ས་གནས་ཉེན་རྟོག་པས་ཀིརྟི་དགོན་པར་དྲག་གནོན་དམ་བསྒྲགས་བྱེད་འགོ་ཚུགས་ཡོད། དེ་ནི་བོད་ས་ཁྱོན་ཡོངས་ལ་ས་བྱི་ལོའི་ཞི་རྒོལ་ཆེན་མོ་བྱུང་ནས་ལོ་གསུམ་འཁོར་བའི་དུས་དྲན་མཚོན་ཆེད་དུ་གྲྭ་པ་ན་གཞོན་ཞིག་གིས་རང་ཉིད་ཀྱི་ལུས་ཕུང་ལ་མེ་སྤར་ཏེ་ངོ་རྒོལ་བྱེད་སྐབས་རྒྱའི་ཉེན་རྟོག་མི་སྣས་གྲྭ་པ་ན་གཞོན་དེའི་ལུས་ཐོག་གི་མེ་བསད་དེ་སྐྱོབ་ཐབས་བྱེད་རྒྱུ་ལས་ལྡོག་སྟེ། ཁོང་ལ་ཉེས་རྡུང་ཚད་མེད་བཏང་སྟབས་དེའི་ཕྱི་ཉིན་ཁོང་འདས་གྲོངས་སུ་གྱུར་ཡོད། དེ་ནི་དོན་རྐྱེན་འདི་ལྷགས་པའི་འབྱུང་རྩ་གཙོ་བོ་ཡིན་ཞིང། དེ་ལ་བརྟེན་ནས་གྲྭ་དམངས་ཀྱི་སེམས་སུ་ཞེ་འཁོན་ཚད་མེད་བྱུང་ཡོད་པ་དང་། རྒྱའི་དྲག་ཆས་ཉེན་རྟོག་པས་ཀིརྟི་དགོན་པར་དྲག་གནོན་དམ་བསྒྲགས་བྱེད་འགོ་བཙུགས་ཡོད།

གནས་ཚུལ་དེ་མུ་མཐུད་པ་ལས་བཟང་ཕྱོགས་ཀྱི་རྣམ་པ་མ་ཐོན་ཚེ་རྒྱའི་དམག་དཔུང་དང་རྔ་པའི་སེར་སྐྱ་མི་མང་དབར་གདོང་ཐུག་གིས་རྐྱེན་ངན་ཡོང་རྒྱུར་ངོས་ལ་བློ་འཚབ་ཆེན་པོ་ཡོང་གི་འདུག དེར་བརྟེན་ངོས་ནས་རྔ་པའི་སེར་སྐྱ་མི་མང་ཡོངས་ལ་རྒྱ་ནག་གཞུང་གིས་དྲག་གནོན་དམ་བསྒྲགས་ཤུགས་ཆེ་བྱེད་པའི་ཁག་འདོགས་བྱེད་ཡུལ་གྱི་ལས་འགུལ་རིགས་རྩ་བ་ནས་སྤེལ་མི་རུང་བའི་རེ་སྐུལ་ནན་པོ་བྱ་རྒྱུ་དང། དེ་བཞིན་རྒྱལ་སྤྱིའི་ཐོག་གི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་ལའང་རྒྱ་ནག་གཞུང་གི་དབུ་ཁྲིད་རྣམ་པར་མྱུར་དུ་དྲག་གནོན་བྱེད་མཚམས་བཞག་སྟེ་གནད་དོན་རྣམས་ཞི་འཇམ་ཐོག་ནས་སེལ་ཐབས་བྱེད་དགོས་པའི་རེ་སྐུལ་ནན་པོ་བྱེད་དགོས་པའི་རེ་བ་འདོན་རྒྱུ་ཡིན།

འདས་པའི་མི་ལོ་དྲུག་ཅུ་བརྒལ་བའི་རིང་རྒྱ་ནག་གཞུང་གིས་བོད་རྒྱའི་དཀའ་རྙོག་སེལ་ཐབས་དྲག་པོའི་ཐབས་ལམ་ལག་སྟར་བྱས་པ་དེས་བོད་མི་རིགས་ཀྱི་སེམས་ནང་གི་དཀའ་སྡུག་དང་ཞེ་འཁོན་ཟབ་ཏུ་སོང་ཡོད། དེར་བརྟེན་ངོས་ནས་རྒྱ་ནག་གི་དཔོན་རིགས་ཚོས་དྲང་བདེན་དང་མཁས་ཤིང་མཛངས་པའི་རྣམ་དཔྱོད་ཀྱི་ལམ་ནས་བོད་མིའི་སེམས་ནང་གི་དངོས་ཡོད་དཀའ་ངལ་རྣམས་ཤེས་པར་བྱས་ཏེ་དྲག་ཤུགས་ཕྱིར་འཐེར་གྱི་ཐོག་ནས་གནད་དོན་འདི་ཐག་གཅོད་བྱེད་དགོས་པའི་འབོད་སྐུལ་ཞུ་རྒྱུ་ཡིན། ཏཱ་ལའི་བླ་མས། ཕྱི་ཟླ་ ༤ ཚེས་ ༡༥ ལ།།

༄༅། །དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༢ པ་སྩལ་གཏན་འཁེལ་བ།

2011-04-15T16:06:39Z

༄༅། །ྋརྒྱལ་བསྟན་ཡོངས་རྫོགས་ཀྱི་མངའ་བདག་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ལ་རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་དང་ སྐུ་བཅར་ཕན་བདེ་ལེགས་བཤད་གླིང་རྣམ་རྒྱལ་གྲྭ་ཚང། དགེ་ལུགས་སྨོན་ལམ་ཚོགས་པས་གཙོས་རང་རིགས་དད་ལྡན་ཁག གཞན་ཡང་ཕྱི་རྒྱལ་མི་སྣ་བཅས་ནས་ཇི་ལྟར་གསོལ་བ་ནན་གྱིས་བཏབ་པ་བཞིན། འཕགས་ཡུལ་གནས་མཆོག་རྡོ་རྗེ་གདན་དུ་དཔལ་དང་པོའི་སངས་རྒྱས་དུས་ཀྱི་འཁོར་ལོའི་དབང་ཆེན་ཟབ་མོ་བཀའ་དྲིན་བསྐྱང་རྒྱུར།

ཕྱི་ཟླ་ ༡༢ ཚེས་ ༣༡ དང་ཕྱི་ལོ་ ༢༠༡༢ ཕྱི་ཟླ་ ༡ ཚེས་ ༡།༢ ཉིན་ས་ཆོག ཕྱི་ཚེས་ ༣།༤།༥ ཉིན་ཕྱེད་སྔོན་འགྲོའི་གསུང་ཆོས་ལ་སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་པ་དང། རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ། དགེ་བཤེས་གླང་ཐང་པ་རྡོ་རྗེ་སེངྒེས་མཛད་པའི་བློ་སྦྱོང་ཚིག་བརྒྱད་མ། དཔལ་མགོན་ཀླུ་སྒྲུབ་ཀྱིས་མཛད་པའི་འཇིག་རྟེན་ལས་འདས་པའི་བསྟོད་པ་བཅས་སྩལ་རྒྱུ། ཕྱི་ཚེས་ ༦ ཉིན་མཆོད་གར། ཕྱི་ཚེས་ ༧ ཉིན་སྟ་གོན། ཕྱི་ཚེས་ ༨།༩ བཀའ་དབང་དངོས་གཞི།

ཕྱི་ཚེས་ ༡༠ ཚེ་དབང་དང་བརྟན་བཞུགས་བསྟར་འབུལ་ཞུ་རྒྱུ་བཅས་ཐུགས་གཏན་འཁེལ་ཞིང། དད་ལྡན་ཆོས་ཞུར་མོས་བློ་ཡོད་རིགས་རྒྱ་ཁྱབ་ཡུལ་གྲུ་ཡོངས་ནས་དུས་ཚེས་མཁྱེན་རྟོགས་ཡོང་ཆེད་ཡོངས་ཁྱབ་ཆོས་བརྡ་གསལ་བསྒྲགས་སུ། སྐུ་སྒེར་ཡིག་ཚང་ནས། ཕྱི་ལོ་ ༢༠༡༡ ཟླ་ ༤ ཚེས་ ༨ ལ།།

༄༅། །སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ནས་མང་གཙོ་གཙང་མའི་ལམ་དུ་ཤར་བསྐྱོད་བྱེད་དགོས་པའི་བཀའ་ནན་སྩལ་བ།

2011-03-31T13:35:28Z

༄༅། །སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ནས་ཆབ་སྲིད་ཀྱི་ཐུགས་འགན་མུ་མཐུད་བཞེས་རྒྱུ་མིན་པར་མང་གཙོ་གཙང་མའི་ལམ་དུ་ ཤར་བསྐྱོད་བྱེད་དགོས་པའི་བཀའ་ནན་སྩལ་བ།

༄༅།།བོད་ཀྱི་ཆབ་སྲིད་ཀྱི་འགྲོ་སྟངས་ངོས་རང་ཆུང་ཆུང་སྐབས་རྒྱལ་ཚབ་ཀྱིས་དབང་ཆ་བཟུང་ནས་ཡོད་པ་དེ་དྲང་པོ་མེད་པའི་གནས་ཚུལ་མང་པོ་ཞིག་ཐོས་མྱོང་ལ། ངོས་རང་གིས་དངོས་སུ་མིག་གིས་མཐོང་བར། དེ་སྐབས་རྒྱལ་ཚབ་སྟག་བྲག་རིན་པོ་ཆེ་རེད། རྒྱལ་ཚབ་སྟག་བྲག་གི་སྐབས་སུ་གཟིམ་ཤག་ཕ་ལྷའི་མི་སེར་སྤོ་བོ་ལགས་ཤིག་གིས་ཕ་ལྷར་ཁ་མཆུ་བཙུགས་ཏེ། ཁ་མཆུ་དེ་རྗེས་སུ་ཤོད་འགག་ལ་སླེབས་ཡོད། ཤོད་འགག་ནས་སྤོ་ལགས་དེས་གཟིམ་ཤག་ཕ་ལྷར་ཁ་མཆུ་བཙུགས་པའི་རྒྱུ་རྐྱེན་ཞུ་བ་ལེན་གྱི་འདུག ཤོད་འགག་གི་ཐོག་ཁར་ཤར་བརྒྱུད་གཟིམ་ཆུང་འཁེལ་ཡོད། དེ་ལ་གནམ་ཡངས་ཆུང་ཆུང་ཞིག་ཡོད་པ་རྗེས་སུ་ཤེལ་སྒོ་དང་ལྕགས་དྲ་ཡོད། དེ་དུས་གད་པ་ཚོས་དེའི་གསང་ནས་བལྟས་ཏེ་ཨ་ཅོག་ཉན་གྱི་འདུག ང་རང་གད་པ་ཚོ་དང་ཧ་ཅང་འཆམ་པོ་ཡོད། ང་ཚོ་ཇ་དང་ཁ་ལག་མཉམ་སྤྱོད་དང་དེ་བཞིན་རྩེད་མོ་རྩེས་པ་སོགས་བྱས་ཏེ་ངོས་རང་གད་པ་ཚོ་དང་ཧ་ཅང་འཆམ་པོ་ཡོད། ཉིན་གཅིག་གད་པ་ཞིག་གིས་ང་ལ་ཁོ་པའི་སར་ཤོག་བརྗོད་བྱུང་། ངས་གོམ་སྒྲ་ཆུང་ངུ་སྤོས་ནས་ཕྱིན་ཏེ། ཐོག་ཁའི་གནམ་ཡངས་ནས་མར་བལྟས་ཏེ་ཨ་ཅོག་ཉན་པ་ཡིན། ཤོད་འགག་ཏུ་སྣེ་མགྲོན་གྱིས་དངོས་གནས་བྱས་ནས་ཁ་མཆུ་ཐུག་སྟེ་ཞུ་བ་ལེན་གྱི་ཡོད་སྟབས། ཞུ་བ་འབུལ་མཁན་གྱི་བདེ་སྡུག་ཚང་མ་ཉན་དགོས་པ་རེད། འོན་ཀྱང་ཉན་གྱི་མི་འདུག སྤོ་ལགས་ཀྱིས་ཡར་བདེ་སྡུག་ཞུ་སྐབས་མར་གཤེ་གཤེ་བཏང་བ་དང་སྤོ་བོ་ལགས་ལ་ཁག་བཏགས་ནས་མ་འགྲིག་མ་འཐུས་པ་དེ་འདྲ་བཤད་སོང་།

དེ་ང་རང་གིས་མཐོང་བྱུང་། ཁྲིམས་ཞེས་པ་དྲང་པོ་དྲང་བཞག་ཅིག་མེད་ན་གང་ཡང་མི་འདུག་བསམ་པ་དང་། དེར་བརྟེན་དེ་དུས་ནས་བོད་ཀྱི་སྲིད་དབང་འཛིན་སྟངས་ཡག་པོ་མི་འདུག་བསམ་བྱུང་། དེ་ནས་རྒྱ་མི་བོད་དུ་སླེབས་རྗེས་ལེགས་བཅོས་སྤྱི་ཚོགས་བཙུགས་ཏེ་བསྒྱུར་བཅོས་གཏོང་རྒྱུའི་འབད་བརྩོན་བྱས་པ་དང། དེ་བཞིན་གྱོད་ཞིབ་ལས་ཁུངས་བཙུགས་པ་ཡིན། ནམ་རྒྱུན་སེར་མོ་བ་ཚོ་གྱོད་དང་ཁ་མཆུ་བྱུང་ན། ཡིག་ཚང་ལས་ཁུངས་ལ་གཏུག་དགོས་ཀྱི་ཡོད། ཡིག་ཚང་ལས་ཁུངས་ནི་སེར་མོ་བའི་སྤྱི་བསྡོམས་ལྟ་བུ་རེད། སྐྱ་བོ་ཚོ་ཁ་མཆུ་བྱུང་ན་ཕལ་ཆེར་རྩིས་ཁང་ལས་ཁུངས་དང་བཀའ་ཤག་ལ་གཏུག་དགོས་ཀྱི་ཡོད། དེ་ནི་ཕྱོགས་ལྷུང་ཐོག་སོང་ནས་ཡག་པོ་ཡོང་གི་མེད་པར་བརྟེན་གྱོད་ཞིབ་ལས་ཁུངས་ཞེས་ཟུར་དུ་བཙུགས་པ་ཡིན། དེའི་འགོ་ཁྲིད་ལ་གཡུ་ཐོག་ས་དབང་ཆེན་མོ་བསྐོས་པ་ཡིན། དེ་དུས་གཡུ་ཐོག་ནི་དྲང་པོའི་ཚད་འཛིན་ས་ལྟ་བུ་ཡིན། ཉིན་གཅིག་ཁ་མཆུ་རྒྱག་མཁན་མི་གཅིག་གིས་གཡུ་ཐོག་གི་གཟིམ་ཤག་ལ་བཅར་ནས་སྐྱབས་རྟེན་ཟེར་བ་གང་ལྟར་ལྐོག་རྔན་སྤྲད་འདུག གཡུ་ཐོག་གྱོང་པོ་ཡིན་སྟབས་སྐྱབས་རྟེན་དེ་བླངས་ནས་སང་ཉིན་ལས་ཁུངས་ལྷན་རྒྱས་ཚུགས་སྐབས་སྐྱབས་རྟེན་སྤྲོད་མཁན་གྱི་མི་དེ་སྐད་བཏང་སྟེ། གྱོད་ཞིབ་ལས་ཁུངས་ཚོགས་པའི་དཀྱིལ་དུ་ཁྱོད་རང་གིས་ཁ་སང་སྐྱབས་རྟེན་འདི་འཁྱེར་ནས་ངའི་སར་ཡོང་ཡོད། འོན་ཀྱང་ངས་སྐྱབས་རྟེན་བཟས་ཏེ་ཁ་མཆུ་ཐག་གཅོད་རྩ་བ་ནས་བྱེད་ཀྱི་མ་རེད། དངོས་ཡོད་གནས་ཚུལ་དྲང་པོ་དྲང་བཞག་ཐོག་ནས་སུས་ནོར་འདུག སུ་ལ་བདེན་པ་འདུག་དེ་ལ་བལྟས་ཏེ་ཐག་གཅོད་བྱེད་རྒྱུ་མ་གཏོགས་སྐྱབས་རྟེན་ལ་བལྟས་ནས་ཐག་གཅོད་བྱེད་ཀྱི་མ་རེད། ཁྱོད་རང་གི་སྐྱབས་རྟེན་འདི་མར་འཁྱེར་ཞིག་ཅེས་ཕྱིར་སློག་བྱས་འདུག དེ་དུས་གཡུ་ཐོག་གིས་དེ་འདྲ་བྱས་པ་རེད་ཅེས་གྲགས་པ་ཆེན་པོ་བྱུང་སོང་། གང་ལྟར་གྱོད་ཞིབ་ལས་ཁུངས་ཟུར་དུ་བཙུགས་པ་རེད། དེ་སྔ་ཡིག་ཚང་དང་བཀའ་ཤག་ནས་བྱེད་ཀྱི་ཡོད། གྱོད་ཞིབ་ལས་ཁུངས་ཟུར་དུ་བཙུགས་ཏེ་སྔར་མེད་གསར་གཏོད་བྱས་པ་རེད། དེ་བཞིན་ལེགས་བཅོས་སྤྱི་ཚོགས་འཛུགས་པ་དེ་ཡང་སྔར་མེད་གསར་གཏོད་ཡིན།

དེ་རྗེས་རྒྱ་གར་དུ་སླེབས་ནས་ཕྱི་ལོ་ ༡༩༦༠ ལོ་ནས་བཟུང་ང་ཚོས་མང་གཙོའི་ལས་འགུལ་འགོ་བཙུགས་བྱས་པ་དང་། དེ་ནས་ལོ་སུམ་ཅུའམ་བཞི་བཅུ་ལྷག་ཙམ་རིང་བསམ་པ་རྣམ་དག་གིས་མང་གཙོའི་ལས་འགུལ་གོམ་པ་རིམ་བགྲོད་ཐོག་ནས་བྱས་ཡོད། ང་ཚོ་བོད་སྤྱི་ཡོངས་ཀྱི་ཁ་རྒྱུན་ལ་ྋརྒྱལ་བ་རིན་པོ་ཆེས་མང་གཙོ་མར་གསོལ་རས་གནང་བྱུང་ཞེས་རྡོག་རྡོག་ཅིག་མར་སྤྲད་པ་ལྟ་བུ་ཤོད་ཀྱི་ཡོད། གང་ལྟར་དུས་ད་ལྟ་བར་དུ་དེ་འདྲ་བྱས་ནས་ཕྱིན་པ་རེད། ལོ་བཅུའི་གོང་ལ་བཀའ་བློན་ཁྲི་པ་འོས་འདེམས་བྱས་ནས་བསྐོས་པ་མ་གཏོགས་ངོས་ཀྱིས་མིང་བཏོན་ནས་བསྐོས་ན་འགྲིག་གི་མི་འདུག་ཅེས་བརྗོད་པ་ཡིན། བཀའ་ཁྲི་མི་མང་གིས་འོས་འདེམས་བྱས་ནས་བསྐོས་ཏེ་ད་ཆ་ལོ་བཅུ་ཕྱིན་ཡོད། དོན་གྱི་ཆ་ནས་བཀའ་བློན་ཁྲི་པ་འོས་བསྡུ་བྱས་ཏེ་བསྐོས་པའི་ཉིན་མོ་དེ་ནས་ྋརྒྱལ་བ་རིན་པོ་ཆེའི་དགའ་ལྡན་ཕོ་བྲང་གི་བླ་བྲང་ཐོག་ནས་བོད་ཀྱི་ལུགས་གཉིས་ཀྱི་དབང་ཆ་ཆ་ཚང་འཛིན་རྒྱུ་དུས་དེ་ནས་འགྱུར་བ་ཕྱིན་ཟིན་པ་རེད། དེར་བརྟེན་ངོས་རང་ཕྱེད་རྒས་ཡོལ་ཡིན་ཞེས་ཤོད་ཀྱི་ཡོད། དེ་ལྟར་ལོ་བཅུ་ཕྱིན་པ་རེད།

ད་ཆ་དངོས་གནས་མང་གཙོ་མཚན་ཉིད་ཚང་བ་དང་། མང་གཙོའི་ངོ་བོ་ཡོངས་སུ་རྫོགས་པ་ཞིག་སྔ་ཕྱི་མ་གཏོགས་བྱེད་དགོས་པ་ལས། རྒྱལ་པོ་དང་བླ་ཆེན་གྱིས་དབང་ཆ་བཟུང་རྒྱུ་ཟེར་བ་དེ་དུས་ཚོད་རྙིང་པའི་སྐད་ཆ་རེད། འཛམ་གླིང་གི་མི་སྤྱི་འགྲོ་སའི་ལམ་ཐོག་ང་ཚོ་འགྲོ་དགོས་པ་ཡིན། འཛམ་གླིང་སྤྱིའི་འགྲོ་ས་དངོས་གནས་མང་གཙོའི་ཐོག་ནས་འོས་བསྡུ་བྱས་ཏེ་འགྲོ་རྒྱུ་དེ་ཡག་ཤོས་རེད། དཔེར་ན། རྒྱ་གར་ལ་ཆ་བཞག་ན་མི་འབོར་ཧ་ཅང་ཆེན་པོ་དང་རྙོག་དྲ་ཡང་ཧ་ཅང་ཆེན་པོ་ཡོད། རིག་གཞུང་དང་། སྐད་ཡིག་རྒྱ་གར་ཤར་ནུབ་ལྷོ་བྱང་སོ་སོ་ལ་མི་འདྲ་བ་ཡོད། འོན་ཀྱང་མང་གཙོ་ཡིན་པ་དང་། ཁྲིམས་ཀྱི་དབང་སྒྱུར་ཡོད་པ། གཏམ་བརྗོད་ཀྱི་རང་དབང་ཡོད་པ། གསར་འགྱུར་གྱི་རང་དབང་ཡོད་པ་དེ་འདྲའི་ཐོག་ནས་རྒྱ་གར་ཧ་ཅང་བརྟན་པོར་གནས་ཐུབ་ཀྱི་ཡོད། ཕར་ཕྱོགས་རྒྱ་ནག་དབང་ཆ་གཅིག་སྡུད་བྱས་ཏེ་བསྡད་ཡོད་སྟབས་ག་དུས་ཡིན་ནའང་དཀའ་ངལ་འཕྲད་ཀྱི་ཡོད། ཉེ་ཆར་རྒྱ་ནག་གཞུང་གི་ཡིག་ཆའི་ནང་རྒྱལ་སྲུང་གི་འགྲོ་སོང་ལས་ནང་ཁུལ་བདེ་འཇགས་ཀྱི་འགྲོ་སོང་མང་བ་ཆགས་འདུག དངོས་གནས་བྱས་ན་དེ་ནི་ཕྱིའི་དགྲ་ལས་ནང་གི་དགྲ་མང་བ་ལྟ་བུ་ཆགས་ཡོད་པས་ངོ་ཚ་དགོས་པ་ཡིན། མི་མང་སྲིད་གཞུང་ཞེས་མི་མང་ལ་ཞབས་འདེགས་ཞུ་མཁན་དང་། གུང་ཁྲན་ཏང་ལ་ཆ་བཞག་ན་མི་མང་ལ་ཞབས་འདེགས་ཞུ་མཁན་ཡིན་ཞེས་ཤོད་ཀྱི་ཡོད། མི་མང་འདོད་པ་ཚིམ་གྱི་ཡོད་མེད་ནི་མང་གཙོའི་འོས་བསྡུ་བྱས་ནས་ཡོང་དགོས་པ་རེད། མང་གཙོའི་འོས་བསྡུ་བྱས་ཏེ་འོས་ཐོབ་ན་གཟི་བརྗིད་རེད། འོས་བསྡུ་མ་བྱས་པར་དྲག་པོའི་མཚོན་ཆའི་ཐོག་ནས་དབང་ཆ་བཟུང་བ་དེའི་དུས་ཚོད་ཡོལ་ཟིན་པ་རེད། དེར་བརྟེན་མི་གཅིག་གི་དབང་ཆ་བཟུང་རྒྱུ་ཟེར་བ་དེ་རྩ་བ་ནས་ཡག་པོ་མ་རེད། ངོས་ཀྱིས་འདིར་མཐར་ཐུག་ྋརྒྱལ་བ་རིན་པོ་ཆེས་དབང་ཆ་བཟུང་བ་ལྟ་བུ་བྱས་ན་རྩ་བ་ནས་ཡག་པོ་མ་རེད།

ྋརྒྱལ་དབང་ཆོས་སྲིད་གཉིས་ཀྱི་དབུ་ཁྲིད་ཞེས་པ་འདི་ྋརྒྱལ་དབང་སྐུ་ཕྲེང་དང་པོ་ནས་བཞི་པ་བར་ལ་བྱུང་མེད། ྋརྒྱལ་དབང་སྐུ་ཕྲེང་ལྔ་པའི་སྐབས་རྐྱེན་མང་པོ་ཞིག་གི་འོག་སོག་པོ་གོ་ཤྲི་ཁང་གིས་རོགས་བྱས་ཏེ་བྱུང་བ་དང་། ཕན་ཐོགས་ཀྱང་བྱུང་ཡོད། ད་ཆ་དུས་རབས་ཉེར་གཅིག་པའི་ནང་སླེབས་ཡོད། འགྱུར་བ་སྔ་ཕྱི་མ་གཏོགས་གཏོང་དགོས་པ་ཡིན། མི་གཞན་ཞིག་གིས་གནོན་ཤུགས་སྤྲད་དེ་འགྱུར་བ་གཏོང་དགོས་བྱུང་ན་དེ་ནི་ྋརྒྱལ་དབང་སྐུ་ཕྲེང་གོང་མ་ཚོའི་མཚན་ཤས་ལ་འགྲོ་གི་རེད་སྙམ། ྋརྒྱལ་དབང་སྐུ་ཕྲེང་ལྔ་པ་ངག་དབང་བློ་བཟང་རྒྱ་མཚོའི་སྐབས་ནས་ྋརྒྱལ་དབང་གིས་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་གནང་རྒྱུ་དེ་ཆགས་ཡོད། ངོས་རང་ྋརྒྱལ་དབང་གི་སྐྱེ་ཕྲེང་བཅུ་བཞི་པ་ཆགས་ཡོད། དེར་བརྟེན་ྋརྒྱལ་དབང་སྐུ་ཕྲེང་བཅུ་བཞི་པས་དང་དུ་བླངས་པ་དང། དགའ་བཞིན་སྤྲོ་བཞིན་དུ་སྤོབས་པ་ལྡན་པའི་ཐོག་ནས་ྋརྒྱལ་དབང་གི་ཆོས་སྲིད་གཉིས་ཀྱི་དབུ་ཁྲིད་ཅེས་པ་འདི་ཕྱིར་བསྡུ་བྱས་ན་ཤིན་ཏུ་འོས་པོ་ཡོད། དེ་ནི་མི་གཞན་སུ་ཞིག་གིས་བྱེད་ཐུབ་པ་ཞིག་མིན། དེ་ནི་ངོས་ཀྱིས་ཐག་གཅོད་བྱེད་ཐུབ་པ་ཞིག་ཡིན་པ་ལྟར་ངོས་ནས་ཐག་བཅད་པ་ཡིན། བོད་ཀྱི་ཆབ་སྲིད་ཀྱི་ལས་འགན་མང་གཙོའི་ཐོག་ནས་འོས་བསྡུ་བྱས་པའི་འགོ་ཁྲིད་ཀྱིས་འགན་དབང་ཆ་ཚང་ཁྱེར་ནས་བྱེད་རྒྱུ་ལས། ངོས་ཀྱིས་འདིར་ཡིག་ཆའི་ནང་ྋརྒྱལ་བ་རིན་པོ་ཆེ་མུ་མཐུད་ཆབ་སྲིད་ཀྱི་འགོ་ཁྲིད་ཡིན་པའི་རྣམ་པ་དེ་བསྡད་ན་མཇུག་མ་ཞིག་ལྷག་པ་ལྟ་བུ་ཆགས་ཀྱི་འདུག དེ་ལ་ངེས་པར་བསྒྱུར་བཅོས་གཏོང་དགོས་པ་དང། ད་ཆ་བསྒྱུར་བཅོས་གཏོང་བའི་དུས་ལ་སླེབས་པ་ལྟ་བུ་འདུག

ཡང་ངོས་ཀྱིས་འབོར་ཤོབ་ཕྲན་བུ་བཤད་ན་ད་ལྟ་བར་ྋརྒྱལ་བ་རིན་པོ་ཆེས་བྱས་རྗེས་གང་ཙམ་བཞག་ཡོད། གཙོ་ཆེ་གཞིས་ལུས་རྒྱ་ཆེའི་མི་མང་གིས་ངོས་ལ་ཡིད་ཆེས་བྱེད་ཀྱི་ཡོད་པ་དང། བཙན་བྱོལ་བོད་མི་ཚོས་ཀྱང་ཡིད་ཆེས་བྱེད་ཀྱི་ཡོད། འཛམ་གླིང་འདིའི་ཐོག་ཏཱ་ལའི་བླ་མ་ཞེས་བརྗོད་དུས་ཡིད་ཆེས་དང་ཆ་འཇོག་བྱེད་ས་ཞིག་ལ་བལྟས་ནས་དགའ་པོ་བྱེད་མཁན་ཧ་ཅང་མང་པོ་ཡོད། དེ་འདྲའི་ྋརྒྱལ་དབང་གི་དུས་ཚོད་དེ་ྋརྒྱལ་བ་ལྔ་པའི་སྐབས་གསར་དུ་བྱུང་བ་དེ་ཕར་ཕུད་ྋརྒྱལ་དབང་གོང་མ་སྐུ་ཕྲེང་གཉིས་པ་དགེ་འདུན་རྒྱ་མཚོ་དང་། གསུམ་པ་བསོད་ནམས་རྒྱ་མཚོ་གཉིས་ཆོས་ཕྱོགས་ཀྱི་ཐོག་ནས་དངོས་གནས་སྤྱི་མོས་ཡོད་ཅིང་། ྋརྒྱལ་བ་དགེ་འདུན་རྒྱ་མཚོ་མཆོག་ལ་རིས་མེད་པའི་ྋརྒྱལ་བ་ཞྭ་སེར་མོ་བ་ཞེས་དེ་འདྲའི་མཚན་ཐོགས་ཡོད། ྋརྒྱལ་དབང་དགེ་འདུན་རྒྱ་མཚོ་མཆོག་འབྲས་སྤུངས་པ་ཡིན་ནའང་རིས་མེད་གནང་མཁན་ཞིག་ཆགས་ཡོད། ཁོང་རྣམ་པ་བཞིན་ངོས་ཀྱིས་ཀྱང་ཚེ་སྨད་འདིར་ཆོས་ཕྱོགས་ཀྱི་འགན་མུ་མཐུད་འཁྱེར་རྒྱུ་ཡིན། ངོས་རང་སྒེར་གྱི་ངོས་ནས་འཛམ་གླིང་འདིའི་སྟེང་ཡ་རབས་སྤྱོད་བཟང་གོང་འཕེལ་གཏོང་རྒྱུའི་ཐོག་ལས་ཀ་བྱེད་ཀྱི་ཡོད་པ་འདིས་གང་ལ་གང་འཚམ་གྱི་ཕན་ཐོགས་ཡོང་གི་ཡོད་པ་འདི་དང་། ཆོས་ལུགས་ཁག་མཐུན་སྒྲིལ་ཡོང་རྒྱུའི་ལས་ཀ་བྱེད་ཀྱི་ཡོད་པ་དེའི་ཐད་གང་ལ་གང་འཚམ་གྱི་ཕན་ཐོགས་ཡོང་གི་འདུག དེང་སང་སློབ་གྲྭ་ཆེན་མོ་མང་པོ་ཞིག་གིས་ཁོང་ཚོའི་སློབ་གྲྭར་ཡོང་རོགས་ཞེས་འབོད་སྐུལ་བྱེད་མཁན་མང་པོ་ཡོང་གི་འདུག དེ་ནི་ཁོང་ཚོས་ང་ཆོས་བཤད་དུ་ཡོང་རོགས་ཞེས་བརྗོད་ཀྱི་མེད། ངོས་ཀྱིས་མིའི་སེམས་ནང་ཇི་ལྟར་བྱས་ཏེ་བདེ་སྐྱིད་ཡོང་ཐབས་བྱེད་དགོས་པའི་སྐོར་བཤད་པ་ལས་ནང་པའི་ཆོས་ཤོད་ཀྱི་མེད། ཡང་ནང་པའི་ཆོས་ནས་བཤད་པའི་ནང་པའི་ཚན་རིག་གི་ཐོག་ནས་འགྲེལ་བཤད་བརྒྱབ་པ་དེར་མི་མང་པོ་ཞིག་གིས་དགའ་པོ་བྱེད་ཀྱི་འདུག དེར་བརྟེན་མི་མང་པོས་དགའ་མོས་བྱེད་པའི་སྐབས་འདིར་ཏཱ་ལའི་བླ་མ་ཆོས་སྲིད་གཉིས་ཀྱི་དབུ་ཁྲིད་རེད་ཟེར་བ་དེ་མཚམས་བཞག་ན། ང་ཚོ་ནམ་རྒྱུན་ཚོགས་འདུ་ཚོགས་ཏེ་ཚོགས་འདུ་གྲོལ་བའི་སྐབས་སུ་ཚོགས་འདུ་རྒྱལ་ཁའི་ངང་ནས་གྲོལ་བ་ཡིན་ཟེར་བ་བཞིན། ྋརྒྱལ་དབང་ལྔ་པ་ནས་བཟུང་ཆོས་སྲིད་གཉིས་ཀྱི་དབུ་ཁྲིད་བྱས་ནས་མི་ལོ་བཞི་བརྒྱར་ཉེ་བ་ཕྱིན་པ་དེ་རྒྱལ་ཁའི་ངང་ནས་མཚམས་འཇོག་བྱེད་རྒྱུ་བྱུང་ན་གཟི་བརྗིད་རེད། ངོས་ཀྱི་བསམ་ཚུལ་འདི་ཡིན། དེ་ནི་ངོས་ཀྱིས་ཐག་བཅད་ཐུབ་པ་ལས་གཞན་སུ་ཞིག་གིས་ཀྱང་ཐག་གཅོད་ཐུབ་ཀྱི་མ་རེད། ཐག་གཅོད་ཐུབ་མཁན་དེས་ྋརྒྱལ་དབང་ལྔ་པ་ཆེན་པོས་དབུ་བཙུགས་པ་དེ་ྋརྒྱལ་དབང་གི་སྐྱེ་ཕྲེང་ཞིག་གིས་ཐག་བཅད་པ་ཡིན། དེ་ལ་འགྱུར་བ་འགྲོ་རྒྱུ་དང་ཤོད་རྒྱུ་གང་ཡང་བསྡད་མེད། ངོས་ནས་དེ་གཅིག་ཤོད་འདོད་བྱུང་།

དེ་རིང་ཁ་སང་བདུན་ཕྲག་གཅིག་གི་ནང་ངོས་ཀྱི་སྐོར་བོད་ནས་ཁ་པར་གཏོང་མཁན་བྱུང་། ྋརྒྱལ་བ་རིན་པོ་ཆེ་རྒས་ཡོལ་གནང་གི་ཡོད་པ་རེད། ད་ང་ཚོ་བོད་པ་ཚོ་དཔའ་བོ་རྒྱབ་ཆད་ལྟ་བུ་ཆགས་སོང་ཞེས་སེམས་ཁྲལ་ཆེན་པོ་བྱེད་ཀྱི་འདུག་ཅེས་ཐོས་བྱུང་། དེ་འདྲ་བྱེད་དགོས་དོན་རྩ་བ་ནས་མེད། ངོས་ཀྱིས་འདིར་རྒས་ཡོལ་བྱས་ནས། ྋརྒྱལ་བ་རིན་པོ་ཆེ་སྐུ་ཕྲེང་བཞི་པ་བར་དུ་ཆོས་ཕྱོགས་ཀྱི་འགོ་ཁྲིད་ལས་ཆབ་སྲིད་ཀྱི་འགན་མེད་ཅིང་། དགའ་ལྡན་ཕོ་བྲང་ནི་ྋརྒྱལ་བ་དགེ་འདུན་རྒྱ་མཚོའི་སྐབས་ནས་ཚུགས་པ་དང་། ཆབ་སྲིད་ཀྱི་འགན་དབང་གང་ཡང་མེད་པར་ཆོས་ཕྱོགས་ཁོ་ནའི་ཐོག་ནས་དངོས་གནས་སྤྱི་མོས་ཡོད་པའི་ཆོས་ཕྱོགས་ཀྱི་དབུ་ཁྲིད་ཅིག་ཆགས་ཡོད། ངོས་ནས་ཀྱང་དེ་བཞིན་ཚེ་སྨད་ཆོས་ཕྱོགས་ཀྱི་ཐོག་ནས་སྤྱི་མོས་ཡོད་པའི་འགོ་ཁྲིད་ཅིག་བྱས་ཏེ་ངོས་ཀྱིས་ཞབས་འདྲེན་ཞུས་མི་ཡོང་། དེ་ལྟར་ངོས་ཀྱིས་ཞབས་འདྲེན་མ་ཞུས་པར་ཧུར་ཐག་འབད་ཐག་བྱས་ནས་བསྡད་ན་སྤྱི་མོས་དེ་ཕལ་ཆེར་མུ་མཐུད་གནས་ཀྱི་རེད། དེར་བརྟེན་སྤྱི་མོས་ཡོད་པའི་ྋརྒྱལ་དབང་གཅིག་གིས་ཆབ་སྲིད་ཀྱི་ལས་ཀ་བཞག་སྟེ་ཆོས་ཕྱོགས་ཐོག་ཕྱིན་ན། དེ་ནི་དངོས་གནས་བྱས་ན་ང་ཚོའི་འདིར་བཙན་བྱོལ་གྱི་སྒྲིག་འཛུགས་ཤིག་ཡོད་པ་དེ་སྲ་བརྟན་གོང་འཕེལ་དང་ཡག་ཏུ་འགྲོ་རྒྱུ་དང་། འཛམ་གླིང་ཐོག་གི་ང་ཚོར་རྒྱབ་སྐྱོར་བྱེད་མཁན་ཚོས་ཀྱང་ཏཱ་ལའི་བླ་མས་ཁ་ཞེ་གཉིས་མེད་ཀྱིས་མཐའ་བསྐྱལ་ཏེ་མང་གཙོ་མཚན་ཉིད་ཚང་བའི་ཐོག་ཕྱིན་སོང་། ཞེས་འཛམ་བུ་གླིང་འདིའི་ཐོག་ཆ་འཇོག་ཆེ་རུ་འགྲོ་རྒྱུ་ཡིན། ཕར་ཕྱོགས་རྒྱ་དམར་གཞུང་ནས་བོད་ལ་དཀའ་ངལ་གང་ཡང་མེད། དཀའ་ངལ་ནི་ཏཱ་ལའི་བླ་མའི་དཀའ་ངལ་རེད་ཟེར་ཤོད་མུས་སུ་ཡོད།

ང་ཚོས་འདིར་ལོ་མང་རིང་དཀའ་ལས་བརྒྱབ་པ་དེ་དག་ཏཱ་ལའི་བླ་མའི་ཐོབ་ཐང་སྐོར་ལ་ཐུག་ཡོད་པ་ལྟ༌བུ་ཤོད་པ་དེ་བརྒྱ་ཆ་བརྒྱ་རྫུན་མ་ཡིན་པ་ད་ལྟ་ངོས་ཀྱིས་ཐག་གཅོད་བྱས་པ་དེའི་ཐོག་ནས་འཛམ་གླིང་ཀུན་ལ་གསལ་པོ་ཆགས་ཡོད། དེར་བརྟེན་བོད་ནང་གི་བོད་མི་ཚོས་ྋརྒྱལ་བ་རིན་པོ་ཆེ་རྒས་ཡོལ་ལ་ཕེབས་པ་རེད་ཅེས་སེམས་ཤུགས་ཆག་དགོས་དོན་རྩ་བ་ནས་མེད། ཁྱེད་རང་ཚོ་ཡག་པོ་བྱས་ཏེ་བསམ་བློ་ཐོངས་དང་། སྤྱི་བྱེ་བྲག་གང་གི་ཆ་ནས་ཡིན་ནའང་ད་རེས་ཀྱི་ཐག་གཅོད་འདི་རླབས་ཆེན་གྱི་ཐག་གཅོད་ཅིག་ཡིན། ཕུགས་རྒྱང་རིང་པོའི་ཆ་ནས་བོད་སྤྱིའི་བསྟན་སྲིད་ལ་ཕན་རྒྱུ་ཡིན་པ་ཤེས་སོང་ངམ། བོད་རྒྱ་ཆེའི་མི་མང་ལ་ཆ་བཞག་ན་ང་ཚོ་འདིར་བཙན་བྱོལ་གྱི་སྒྲིག་འཛུགས་ཤིག་ཡོད་པ་འདི་བརྟན་དུ་དང་། མདུན་ནས་མདུན་དུ་བསྐྱོད་ཀྱི་ཡོད། ཕར་ཕྱོགས་རྒྱ་ནག་གུང་ཁྲན་གྱི་གཅིག་སྡུད་ལམ་ལུགས་དང་། ང་ཚོ་བཙན་བྱོལ་བ་ཉུང་ཤས་ཀྱི་མང་གཙོའི་ལམ་ལུགས་གཉིས་བསྡུར་ན་ང་ཚོ་འདིར་དེང་རབས་ཅན་དུ་བསྒྱུར་རྒྱུ་ཆ་ཚང་བ་བྱུང་ཡོད། དེ་ནི་ང་ཚོའི་གཟི་བརྗིད་དང་། བོད་ནང་གི་རྒྱ་ཆེའི་མི་མང་ཚོ་ཡིན་ནའང་སྤོབས་པ་བྱེད་ཆོག་པའི་གནས་ཚུལ་ཞིག་ཡིན་པ་འདི་ཁྱེད་རང་ཚོས་ཤེས་པ་བྱེད་དགོས། ངོས་རང་སེམས་ཤུགས་ཆག་པའམ་བོད་སྤྱི་པའི་དོན་བློས་བཏང་བ་ལྟ་བུ་རྩ་བ་ཉིད་ནས་མིན། ངོས་རང་བོད་གངས་ཅན་པའི་ཡུལ་མི་ཞིག་ཡིན། བོད་གངས་ཅན་པ་ས་ཡ་དྲུག་གི་བོད་མི་སྤྱི་བོ་གནམ་བསྟན་ཡོངས་ལ་བོད་སྤྱི་པའི་དོན་དག་གི་འགན་འཁྲིས་ཡོད། ངོས་ལ་ཆ་བཞག་ནའང་བོད་མི་སྤྱི་བོ་གནམ་བསྟན་གྱི་གྲས་ཤིག་སྟེ། མདོ་སྨད་ཨ་མདོའི་ཡུལ་ནས་ཡོང་པའི་གངས་ཅན་བོད་མི་ཞིག་ཡིན། ངོས་རང་མ་འཆི་བར་ང་ལ་འགན་ཡོད་པ་ཡིན། ང་རང་ད་ལྟ་གཟུགས་པོ་བདེ་པོ་ཡོད་པའི་སྐབས་ལ་ཁྱེད་རང་ཚོས་འགན་ཆ་ཚང་འཁྱེར་དང་། དམིགས་བསལ་དཀའ་ངལ་འཕྲད་དེ་ངོས་ཀྱིས་མ་བྱས་ན་མི་འགྲིག་པ་ལྟ་བུ་བྱུང་ན་ངོས་རང་འདིར་ཡོད་བཞིན་པ་རེད། ངོས་ཀྱིས་བློས་བཏང་བ་མ་ཡིན་ལ། ངོས་རང་སེམས་ཤུགས་ཆག་སྟེ་བསྐྱུར་བའང་མིན། དགོས་པ་རྒྱུ་མཚན་ཆེན་པོ་མཐོང་ནས་ང་ཚོ་མང་གཙོའི་ཐོག་ལ་བསྐྱོད་དེ་འགན་ཆ་ཚང་འཁྱེར་རོགས་བྱེད་ཟེར་རྒྱུ་དེ་ཡིན། ཁྱེད་རང་ཚོ་བློ་གཡེང་རྩ་བ་ནས་བྱེད་མི་དགོས་ཤེས་སོང་ངམ ཁྱེད་རང་ཚོ་འདིར་དངོས་སུ་ཡོད་པ་དང་། དེ་བཞིན་བོད་གངས་ཅན་ལྗོངས་ལ་ཡོད་པ་ཚོ་བློ་གཡེང་རྩ་བ་ནས་བྱེད་མི་དགོས། ཚང་མ་བློ་བདེ་པོ་བྱེད་དགོས། གནས་ཚུལ་དེ་འདྲ་ཡིན།

ཁ་སང་རང་རྒྱ་མིའི་མཁས་པ་ཞིག་ཐུག་བྱུང་། ཁོང་རང་འདི་ཕྱོགས་ང་ཚོའི་འོས་བསྡུའི་སྐོར་ལ་ཉམས་ཞིབ་བྱེད་པར་ཡོང་བ་ཡིན། དེ་སྔོན་ཡང་ལོ་ལྔའི་གོང་ལ་ཡོང་སྟེ་ཞིབ་འཇུག་བྱས་པ་ཡིན། ད་རེས་ཀྱི་འོས་བསྡུའི་ཐོག་མི་མང་པོས་དངོས་གནས་བསམ་བློ་བཏང་སྟེ་སེམས་ཁུར་བླངས་ནས་མང་གཙོའི་ལས་འགན་སྒྲུབ་རྒྱུ་དང་། མང་གཙོའི་འཚོ་བར་དངོས་སུ་ལོངས་སྤྱོད་པ་བཅས་ཡར་རྒྱས་ཧ་ཅང་ཆེན་པོ་ཕྱིན་འདུག་ཅེས་བསྔགས་བརྗོད་བྱེད་ཀྱི་འདུག དེ་ནི་ང་ཚོའི་ཆབ་སྲིད་ཀྱི་གོ་རྟོགས་མཐོ་ཏུ་སོང་སྟེ་མདུན་ནས་མདུན་དུ་ཡར་རྒྱས་འགྲོ་གི་ཡོད་པའི་རྟགས་མཚན་ཡིན། དེ་རིང་ངོས་ཀྱིས་ཐག་གཅོད་བྱས་པ་དེ་ཡང་མདུན་ནས་མདུན་དུ་ཡར་རྒྱས་འགྲོ་བའི་ཆ་རྐྱེན་ཞིག་ཡིན་པ་ལས་སེམས་ཤུགས་ཆག་རྐྱེན་ཞིག་རྩ་བ་ནས་མིན། དེ་ཁྱེད་རང་ཚོའི་སེམས་ལ་ངེས་པ་བྱེད་དགོས། ཤེས་སོང་ངམ། ཁྱེད་རང་ཚོ་བོད་ལ་ཕྱིར་ལོག་རྗེས་བློས་འཁེལ་བ་ཚོར་བཤད་ས་ཡོད་ན་བཤད། གཅིག་བྱས་ན་དེ་རིང་རླུང་འཕྲིན་ནང་གཏོང་མདོག་ཁ་པོ་རེད། གཞིས་ལུས་རྒྱ་ཆེའི་མི་མང་ལ་ྋརྒྱལ་བ་རིན་པོ་ཆེ་རྒས་ཡོལ་བྱས་པ་འདི་གནས་སྐབས་དང་མཐར་ཐུག་གི་དགོས་པ་རྒྱུ་མཚན་མང་པོ་ཞིག་ལ་ལོ་ནས་ལོ་སྦྲེལ་ཏེ་བསམ་བློ་བཏང་ནས་ཐག་བཅད་པ་ཡིན། དེས་བོད་ཀྱི་བསྟན་སྲིད་སྤྱི་ལ་ཡུན་རིང་པོའི་ཆ་ནས་ཕན་ཐོགས་ཡོད་པ་ཞིག་ཡིན་པས་བློ་གཡེང་རྩ་བ་ནས་བྱེད་མི་དགོས། ཡང་དགའ་ལྡན་ཕོ་བྲང་ཞེས་པ་བསྡུ་གསོག་རྒྱག་རྒྱུ་མ་རེད། དགའ་ལྡན་ཕོ་བྲང་ནི་ངོས་ཀྱི་བླ་བྲང་ཆགས་ཡོད། ངོས་བསྡད་པའི་རིང་ལ་བླ་བྲང་ཆུང་ཆུང་ཞིག་དགོས་པ་ཡིན། དེ་འདྲ་ཡིན་དུས་དགའ་ལྡན་ཕོ་བྲང་མུ་མཐུད་གནས་ཀྱི་རེད། དགའ་ལྡན་ཕོ་བྲང་གི་ཆབ་སྲིད་ཀྱི་འགན་དབང་བཞག་པ་མ་གཏོགས། དགའ་ལྡན་ཕོ་བྲང་གནས་ཡོད། ད་དུང་ད་ལྟ་བྲེལ་བ་གང་ཡང་མི་འདུག

ལོ་ཉི་ཤུ་སུམ་ཅུའི་རྗེས་ངོས་ཀྱི་མི་ཚེའི་མཐར་སླེབས་ན་དེའི་ཚེ་དེའི་དུས་ལ་བོད་པ་གཙོ་བོར་གྱུར་པའི་ྋརྒྱལ་དབང་དང་དམིགས་བསལ་གྱི་འབྲེལ་བ་ཡོད་མཁན་གྱི་ནང་པའི་ཡུལ་གྲུ་ཁག་ཚོས་ྋརྒྱལ་དབང་མུ་མཐུད་དགོས་པ་བརྗོད་ན་དགའ་ལྡན་ཕོ་བྲང་གནས་ཡོད་པས། མུ་མཐུད་སྐུ་ཕྲེང་བཅོ་ལྔ་པ་དང་། བཅུ་དྲུག་པ། བཅུ་བདུན་པ་ཞེས་ཡོང་ཐུབ་པ་ཡིན། ཤེས་སོང་ངམ། ཧ་ཅང་བརྟན་པོ་ཆགས་ཡོད། ཆབ་སྲིད་ལ་འཕོ་འགྱུར་ཡོང་གི་རེད། དགའ་ལྡན་ཕོ་བྲང་ནི་ྋརྒྱལ་དབང་སྐུ་ཕྲེང་གཉིས་པ་དང་། གསུམ་པ། བཞི་པ་བཅས་ཀྱི་སྐབས་ལྟར་ཆོས་ཕྱོགས་ཁོ་ནའི་དབུ་ཁྲིད་གནང་ན་ཧ་ཅང་དགེ་མཚན་ཡོད། མ་འོངས་པར་ཕུགས་རྒྱང་རིང་པོའི་ཆ་ནས་བསམ་བློ་བཏང་ན་དེ་འདྲའི་དགེ་མཚན་ཆེན་པོ་ཡོད། ཁ་སང་སྤྱི་འཐུས་ལ་སྤྲད་པའི་ཡི་གེའི་ནང་དགའ་ལྡན་ཕོ་བྲང་གི་གཞུང་ཟེར་བའི་ཚིག་དེ་བསྒྱུར་བཅོས་གཏོང་རྒྱུ་ཆགས་ཀྱི་རེད་ཟེར་བ་དེ་དགའ་ལྡན་ཕོ་བྲང་བསྡུ་གསོག་རྒྱག་དགོས་པའི་སྐད་ཆ་མིན། དགའ་ལྡན་ཕོ་བྲང་མུ་མཐུད་གནས་ཀྱི་རེད། འོན་ཀྱང་ཆབ་སྲིད་ཀྱི་དབང་ཆའི་འགན་དབང་ཁྱེར་བའི་དགའ་ལྡན་ཕོ་བྲང་གི་གཞུང་ངམ། སྒྲིག་འཛུགས་ཞེས་བརྗོད་པ་དེ་མི་འགྲིགས་པས་བསྡུ་གསོག་བརྒྱབ་སྟེ། ད་ཆ་ང་ཚོ་མང་གཙོའི་གཞུང་ཆགས་ཡོད། ཅེས་བཀའ་སློབ་ཟབ་མོ་སྩལ།། །། (ཕྱི་ལོ་ ༢༠༡༡ ཟླ་ ༣ ཚེས་ ༡༩ བོད་ཟླ་ ༡ ཚེས་ ༡༥ ཉིན་ཐེག་ཆེན་ཆོས་གླིང་གཙུག་ལག་ཁང་གི་གསུང་རར་ཆོ་འཕྲུལ་སྨོན་ལམ་ཆེན་མོའི་སྐྱེས་རབས་གསུང་ཆོས་སྐབས་སྩལ་བའི་བཀའ་སློབ།)

བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ། ༢༠༡༡

2011-03-30T18:32:48Z

བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པའི་གཏན་འབེབས་ལས་རིམ།

བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ། ༢༠༡༡

༄༅། །བོད་མི་མང་སྤྱི་འཐུས་ལྷན་ཚོགས་སྐབས་ ༡༤ པའི་གྲོས་ཚོགས་ཚོགས་དུས་ ༡༡ པའི་ཐོག་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་གསུང་འཕྲིན་རིན་པོ་ཆེ་སྤྱི་བསྩལ་ཐོག་བགྲོ་གླེང་གྲོས་བསྡུར་རིམ་པ་དང༌། གྲོས་ཆོད་སྔ་རྗེས་བཞག་པའི་མཐའ་དོན་གྲོས་ཆོད་ཨང་ ༢༠༡༡།༡༤།༡༡།༧ ཡིག་ཆ་ཨང་ ༤༨ པའི་དགོངས་དོན་ལྟར། བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་ཚོགས་གཏན་འཁེལ་བར་བཀའ་ཤག་དང༌། སྤྱི་འཐུས་རྒྱུན་ལས་ནས་གཏན་འབེབས་གནང་བའི་ལས་རིམ་གཤམ་གསལ། དང་པོ། ཚོགས་འདུའི་མིང༌། བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ། ༢༠༡༡ གཉིས་པ། ཚོགས་དུས། ཕྱི་ལོ་ ༢༠༡༡ ཟླ་ ༥ ཚེས་ ༢༡ རེས་གཟའ་སྤེན་པ་ནས་ཚེས་ ༢༣ རེས་གཟའ་ཟླ་བ་བར་ཉིན་གསུམ། གསུམ་པ། ཚོགས་ཡུལ། བཞུགས་སྒར་རྡ་རམ་ས་ལ། བཞི་པ། ཚོགས་མིའི་ཡོང་ཁུངས། ཀ། བཀའ་བློན་ཁྲི་པ་དང༌། བཀའ་བློན་ལས་ཟུར་རྣམ་པ། ཁ། བཀའ་ཤག་སྐབས་ ༡༤ པར་འོས་ཐོན་བཀའ་ཁྲི། ག། སྤྱི་འཐུས་ལས་ཟུར་རྣམ་པ། ང༌། སྐབས་ ༡༥ པའི་བོད་མི་མང་སྤྱི་འཐུས་སུ་འོས་ཐོན་སྤྱི་འཐུས་རྣམ་པ། ཅ། རྡ་སར་གནས་འཁོད་གཞུང་ཞབས་ཟུང་དྲུང་ཡན། ཆ། ས་གནས་འཐུས་མིའི་ཚོགས་འདུ་ཁག་གི་སྐུ་ཚབ་རེ། ས་འཐུས་མེད་པའི་ས་གནས་ཁག་ནས་མི་མང་གི་སྐུ་ཚབ་རེ། ཇ། ས་གནས་རང་བདེན་ཚོགས་ཆུང་ཁག་གི་སྐུ་ཚབ་རེ། ཉ། ཆོས་བརྒྱུད་ཆེན་པོ་བཞི་དང༌། གཡུང་དྲུང་བོན་བཅས་སོ་སོའི་གྲྭ་བཙུན་སྐུ་ཚབ་ ༦ རེ། ཏ། ཕྱི་རྒྱལ་ཡུལ་གྲུ་ཁག་གི་བོད་རིགས་ཚོགས་པ་དང༌། བོད་རིགས་སྤྱི་མཐུན་ཚོགས་པ་རྣམས་ཀྱི་སྐུ་ཚབ་རེ། ༼ཕྱི་དྲིལ་ལས་ཁུངས་བརྒྱུད།༽ ཐ། གཞུང་འབྲེལ་མིན་པའི་ཚོགས་པ་ཁག་ནས་སྐུ་ཚབ་གཉིས་རེ། ༼གཞུང་འབྲེལ་མིན་པའི་ཚོགས་པ་ཁག་གི་མཚན་གཞུང་ཟུར་འཛར་དང་པོ།༽ ད། རང་སྐྱོང་སྡེ་ཚན་ཁག་གི་སྐུ་ཚབ་རེ། ༼རང་སྐྱོང་སྡེ་ཚན་གྱི་མཚན་གཞུང་ཟུར་འཛར་གཉིས་པ།༽ ན། རྒྱུན་ལྡན་བོད་དོན་ཐོག་ཐུགས་སྣང་དང༌། འགན་འཁུར་ལས་འགུལ་གནང་མཁན། མཁས་དབང༌། ཆེད་ལས་པ། སྤྱི་ཚོགས་ཞབས་ཞུ་བ་བཅས་མཉམ་ཞུགས་གནང་འདོད་ཡོད་རིགས་ནས་དྭང་བླང་ཕེབས་མཁན་རྒྱ་བལ་འབྲུག་གསུམ་ནས་མི་གྲངས་ ༣༠ དང༌། དེ་མིན་ནས་མི་གྲངས་ ༢༠ ལས་མ་མང་བ་བཅས། ལྔ་པ། གྲོས་གཞི། བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་སྙན་ཐོ་སྤྱི་དང༌། ཁྱད་པར་དུ་བཅའ་ཁྲིམས་བསྐྱར་བཅོས་བྱ་རྒྱུའི་སྔོན་གླེང་དང༌། དོན་ཚན་དང་པོའི་སྐོར། དྲུག་པ། ལས་རིམ། སྔ་དྲོ་ཆུ་ཚོད་ ༩ཿ༣༠ ནས་ཕྱི་དྲོ་ཆུ་ཚོད ༥ཿ༠༠ པ་བར། ཚོགས་འདུ་ཉིན་དང་པོར་དབུ་འབྱེད་གྲུབ་འཕྲལ་ཚོགས་མི་རྣམས་ཚོགས་ཆུང་ཁག་བགོས་ཀྱིས་ཉིན་དང་པོ་དང༌། ཉིན་གཉིས་པའི་དགུང་ཚིགས་བར་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་རྒྱབ་གཉེར་སྙན་ཐོ་ནང་གསལ་སྔོན་གླེང་དང༌། དོན་ཚན་དང་པོའི་ཚིག་དོན་ལ་གོ་བསྡུར་དང་འབྲེལ་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ལ་གསོལ་འདེབས་ཞུ་ཕྱོགས་སྐོར་གྲོས་བསྡུར་བྱ་རྒྱུ། ཉིན་གཉིས་པའི་ཉིན་རྒྱབ་ཏུ་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་སྙན་ཐོའི་དོན་ཚན་གཞན་ཐོག་དགོངས་ཚུལ་བསྡུ་རུབ་བྱ་རྒྱུ། ཉིན་གསུམ་པར། ཚོགས་ཆུང་སོ་སོའི་སྙན་ཐོ་སྙན་སྒྲོན་གནང་རྒྱུ་དང༌། བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་རྒྱབ་གཉེར་སྙན་ཐོ་ནང་གསལ་སྔོན་གླེང་དང༌། དོན་ཚན་དང་པོའི་སྐོར་ལ་གསོལ་འདེབས་ཞུ་རྒྱུའི་གྲོས་ཆོད་འཇོག་རྒྱུ། བདུན་པ། ཚོགས་ཆུང་ཆ་བགོས། ཚོགས་མི་ཡོངས་རྫོགས་རྒྱན་བསྐྱུར་ལམ་ནས་ཚོགས་ཆུང་ཁག་ཏུ་ཆ་བགོས་བྱ་རྒྱུ། བརྒྱད་པ། མཇུག་གནོན་གནང་ཕྱོགས། ཕྱི་ལོ་ ༢༠༡༡ ཕྱི་ཟླ་ ༥ ཚེས་ ༢༤ ཉིན་ཚོགས་ཆེན་གྱི་གྲོས་ཆོད་སྤྱི་ནོར་ྋགོང་ས་ྋསྐྱབས་མགོན་ཆེན་པ་མཆོག་ལ་གསོལ་འདེབས་ཞུ་རྒྱུ་དང༌། བཅའ་ཁྲིམས་བསྐྱར་བཅོས་དང་འབྲེལ་བའི་བསམ་འཆར་ཁག་སྐབས་ ༡༤ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་འཕར་མའི་ཐོག་བཅའ་ཁྲིམས་བསྐྱར་བཅོས་གཏན་འབེབས་སྐབས་དཔྱད་གཞིའི་ཁོངས་འཇོག་རྒྱུ། དགུ་པ། ཚོགས་དྲུང༌། ཚོགས་དྲུང་གི་ལས་འགན་སྔར་ལམ་ལྟར་ཚོགས་དྲུང་ལས་ཁུངས་ནས་འགན་བཞེས་གནང་རྒྱུ་དང༌། ལས་བྱ་འཕར་མ་ཇི་དགོས་བཀའ་ཤག་ནས་གོ་སྒྲིག་གནང་རྒྱུ་བཅས། བཀའ་ཤག་དང༌། སྤྱི་འཐུས་རྒྱུན་ལས་ཐོུང་ནས་སྤྱི་མོས་ཀྱིས་ཕྱི་ལོ་ ༢༠༡༡ ཟླ་ ༣ ཚེས་ ༢༩ ཉིན་གཏན་འབེབས་གནང༌།། ཟུར་འཛར་དང་པོ། ༄༅། །གཞུང་འབྲེལ་མིན་པའི་ཚོགས་པ་ཁག་གི་མཚན་གཞུང༌།

༡༽ དབུས་གཙང་ཆོལ་ཁའི་རྒྱུན་ལས། ༢༽ མདོ་སྟོད་ཆོལ་ཁའི་རྒྱུན་ལས། ༣༽ མདོ་སྨད་ཆོལ་ཁའི་རྒྱུན་ལས། ༤༽ བོད་ཀྱི་གཞོན་ནུ་ལྷན་ཚོགས། ༥༽ བོད་ཀྱི་བུད་མེད་ལྷན་ཚོགས། ༦༽ རྒྱལ་ཡོངས་མང་གཙོ་ཚོགས་པ། ༧༽ དགུ་བཅུ་གསུམ་ཚོགས་པ། ༨༽ མངའ་རིས་སྤྱི་མཐུན་ཚོགས་པ། ༩༽ ཆོལ་གསུམ་ཆིག་སྒྲིལ་ཚོགས་པ། ༡༠༽ བོད་རྒྱལ་ཡོངས་ཆབ་སྲིད་བཙོན་གྲོལ་ཚོགས་པ། ཟུར་འཛར་གཉིས་པ། ༄༅། རང་སྐྱོང་སྡེ་ཚན་ཁག་གི་མཚན་གཞུང༌།

༡༽ བོད་ཀྱི་ཟློས་གར་ཚོགས་པ། ༢༽ བོད་ཀྱི་དཔེ་མཛོད་ཁང༌། ༣༽ ཝར་ཎ་བོད་ཀྱི་གཙུག་ལག་སློབ་གཉེར་ཁང༌། ༤༽ ནོར་གླིང་བོད་ཀྱི་རིག་གཞུང་གཅེས་སྐྱོང་ཁང༌། ༥༽ རྡོར་གླིང་འཇམ་དབྱངས་བོད་ཀྱི་རིག་གཞུང་གཅེས་སྐྱོང་ཁང༌། ༦༽ ལྡི་ལི་བོད་ཁང༌། ༧༽ བོད་ཁྱིམ་སྤྱི་ཁྱབ་ལས་ཁུངས། ༨༽ མ་སུ་རི་བོད་ཁྱིམ། ༩༽ སཾ་བྷོ་ཊ་བོད་སློབ་འཛིན་སྐྱོང་ཁང༌། ༡༠༽ བོད་ཀྱི་གསོ་བ་རིག་པའི་ཆེས་མཐོའི་སྨན་པའི་ལྷན་ཚོགས། ༡༡༽ དབུས་སྨན་རྩིས་ཁང༌། ༡༢༽ བདེ་ལེགས་སྨན་ཁང༌། ༡༣༽ ཤེས་རིག་དཔར་ཁང༌། ༡༤༽ བལ་ཡུལ་གངས་ཅན་བདེ་རྩ། ༡༥༽ སྤྱི་མཐུན་མཉམ་འབྲེལ།

འགན་འཁུར་དགོས་པ་དེ་འཁུར་ཐུབ་སོང་བསམ་ཡོད།

2011-03-28T11:34:19Z

བོད་ཀྱི་དུས་བབ་ཀྱིས་འདོན་སྤེལ། ༢༠༡༡/༠༣/༢༦ གྲོས་ཚོགས་འཐུས་མི་ནི་མི་མང་གི་སྐུ་ཚབ་ཡིན་སྟབས། མི་མང་གི་མངོན་འདོད་གཞིར་བཞག་ཐོག་གསོལ་བ་ཕུར་ཚུགས་སུ་འདེབས་པའི་གྲོས་ཆོད་ཅིག་འཇོག་ཐུབ་པ་དེ་ནི། ལོ་རྒྱུས་ནང་གལ་གནད་ཆེན་པོ་ཞིག་ཆགས་ཡོད་པར་ངོས་འཛིན་ཞུ་བཞིན་ཡོད། ཅེས་སྤྱི་འཐུས་ཚོགས་གཙོས་གསུངས།

ཁ་སང་ཕྱི་ཚེས་ ༢༥ ཉིན་སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པ་ཡོངས་སུ་མཇུག་བསྒྲིལ་ཡོད་ཅིང་། ཐེངས་འདིའི་གྲོས་ཚོགས་ནང་༧གོང་ས་མཆོག་གི་བགྲེས་ཡོལ་དང་འབྲེལ་ཏེ། བཙན་བྱོལ་བོད་མིའི་བཅའ་ཁྲིམས་ནང་གི་༧གོང་ས་མཆོག་གི་སྐུ་དབང་དང་འབྲེལ་བའི་ཐོག་བགྲོ་གླེང་ཡང་ཡང་བྱས་མཐར་གྲོས་ཚོགས་ཀྱིས་རྒྱབ་གཉེར་གནང་སྟེ། མི་འགྱང་པའི་དུས་ཡུན་ནང་བཀའ་སྤྱི་གཉིས་ལས་གྲུབ་པའི་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་ཞིག་བཙུགས་ཏེ། ཕྱི་ཟླ་ ༥ ཚེས་ ༢༡ ནང་ཚུན་དུ་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་དེ་འཚོགས་བསྐངས་ཏེ་མང་ཚོགས་ལ་དགོངས་འཆར་བསྡུ་རྒྱུར་སྤྱི་མོས་གྲོས་ཆོད་བཞག་སོང་།

ཁ་སང་ཕྱི་དྲོར་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གྲོས་ཚོགས་ཚོགས་དུས་བཅུ་གཅིག་པའི་མཇུག་བསྡོམས་གཏམ་བཤད་གནང་དོན། ཐེངས་འདིའི་གྲོས་ཚོགས་ཀྱི་ལས་རིམ་གཙོ་བོ་༸གོང་ས་མཆོག་གི་གསུང་འཕྲིན་ཐོག་ཉིན་བརྒྱད་ཀྱི་དུས་ཚོད་བཏང་སྟེ། ཚོགས་ཆུང་ཁག་གི་སྙན་ཐོ་དང་དྲི་བ་དྲིས་ལན། ཐུག་སྣང་གཞེན་སྐུལ་བཅས་དུས་ཚོད་ཏག་ཏག་ཞིག་གི་ནང་འགྲུབ་ཐུབ་པ་དེ་གཙོ་བོ་འཛིན་སྐྱོང་བཀའ་ཤག་དང་སྤྱི་འཐུས་རྣམ་པའི་མཐུན་འགྱུར་ལས་བྱུང་སྟབས་ཐུགས་རྗེ་ཞུ་རྒྱུ་ཡིན། ད་རེབ་༸གོང་ས་མཆོག་གིས་གྲོས་ཚོགས་སུ་ཕེབས་པའི་གསུང་འཕྲིན་དེ་ནི། བོད་མི་སུ་འདྲ་ཞིག་ཡིན་རུང་སེམས་ནང་མ་ཤོང་བ་ཞིག་དང་། གང་འདྲ་ཞིག་ཆགས་ཡོངས་ན་བསམ་པའི་བློ་འཚབ་ཀྱི་རང་བཞིན་ཞིག་ཆགས་ཡོད་སྟབས། གྲོས་ཚོགས་ཚོགས་བཞིན་དུ་མང་ཚོགས་ཀྱི་ཁྲོད་ནས་ཡི་གེ་མང་པོ་ཞིག་འབྱོར་བསྡད་ཀྱི་འདུག་ལ། དེ་བཞིན་ས་གནས་ཁག་དང་མི་སྒེར་བ་བཅས་ཀྱི་བསམ་ཚུལ་མི་འདྲ་ཐོན་ཡོད་ཀྱང་། ད་ལྟའི་ཆབ་སྲིད་འཕོ་འགྱུར་གྱི་གནས་སྟངས་འདི་འདྲའི་སྐབས་སུ་ཐུགས་འཁུར་ཆེན་པོ་བཞེས་ཏེ་གྲོས་ཚོགས་དང་སྐུ་སྒེར་ཡིག་ཚང་། བཀའ་ཤག་བཅས་ལ་ཕུལ་བའི་གནས་སྟངས་ཆགས་ཡོད་སྟབས། མི་མང་གི་ངོས་ནས་བོད་པའི་ཆབ་སྲིད་ལ་ཐུགས་འགན་བཞེས་པར་ཐུགས་རྗེ་ཆེ་ཞུས་བ་ཡིན། ཞེས་དང་།

ཡང་ཁོང་གིས་མུ་མཐུད་དོན། ༸གོང་ས་མཆོག་གི་གསུང་འཕྲིན་གྲོས་ཚོགས་ནང་སྙན་སྒྲོན་ཞུས་པར། བཙན་བྱོལ་གྱི་མང་ཚོགས་དང་གྲོས་ཚོགས་འཐུས་མི། འཛིན་སྐྱོང་བཀའ་ཤག་བཅས་ཚང་མ་སེམས་སྡུག་གི་དབང་གིས་གསུང་འཕྲིན་ལ་དགའ་བསུ་ཞུ་མ་ཐུབ་པའི་གནས་སྟངས་ཆགས་ཡོད། གསུང་འཕྲིན་ལ་ཞིབ་ཚགས་པོའི་ཐོག་ནས་དཔྱད་ཞིབ་གནང་ཆེད་ཉིན་མཐའ་མར་དུས་ཚོད་སྟོང་པ་དང་། ཚེས་ ༡༥ ཉིན་གང་བོར་གསུང་འཕྲིན་ཐོག་དགོངས་ཚུལ་གསུངས་བའི་གོ་སྐབས་གནང་སྟེ་ཚོགས་མི་བརྒྱ་ཆའི་ ༩༠ ལྷག་གིས་མུ་མཐུད་ཆབ་སྲིད་ཀྱི་ཐུགས་འགན་བཞེས་དགོས་པའི་མངོན་འདོད་དང་། སྤྱི་འཐུས་སྒེར་གྱི་དགོངས་ཚུལ་གཞིར་བཅོལ་ཏེ་དགོངས་ཚུལ་གསུངས་ཡོད། ཡིན་ནའང་། གསུང་འཕྲིན་དེ་གལ་གནད་ཆེན་པོ་དང་ལོ་རྒྱུས་ཀྱི་དོན་སྙིང་ལྡན་པའི་གནས་ཚུལ་ཞིག་ཡིན་སྟབས། ཡང་བསྐྱར་ཚེས་ ༡༦ དང་ ༡༧ བཅས་ཉིན་གཉིས་རིང་གོ་བསྡུར་སྦྱང་བཤད་གནང་ཡང་། ཆབ་སྲིད་ཀྱི་ཐུགས་འགན་མུ་མཐུད་བཞེས་དགོས་ཞེས་བསྟན་བསྡད་པ་རེད། ཅེས་དང་།

ཕྱི་ཚེས་ ༡༨ ཉིན་བསྐྱར་དུ་གཞུང་འབྲེལ་གྲོས་ཆོད་གྲོས་འཆར་གྲོས་ཚོགས་སུ་ཕེབས་ཏེ། ཉིན་གང་བོར་བགྲོ་གླེང་བྱས་མཐར་གྲོས་ཆོད་དོན་ཚན་གསུམ་གྱི་གཙོ་བོ། ༸གོང་ས་མཆོག་ལ་ཆབ་སྲིད་དང་འཛིན་སྐྱོང་གི་ཐུགས་འགན་མུ་མཐུད་བཞེས་དགོས་ཀྱི་འདུག་ཅེས་གསོལ་བ་ཕུར་ཚུགས་སུ་འདེབས་དགོས། ཞེས་བསྟན་ཡོད་ཀྱང་། སྤྱི་ཚོགས་ནང་༸གོང་ས་མཆོག་གི་གསུང་འཕྲིན་ལ་གྲོས་ཚོགས་ཀྱིས་བདག་པོ་མ་བརྒྱབ་པར་གསོལ་བ་ཕུར་ཚུགས་སུ་བཏབ་པ་རེད་ཅེས་བཤད་ཡོད། བཤད་སྟངས་དེར་ལྟ་སྟངས་མི་འདྲ་བ་ཞིག་དང་སྡུག་ས་ཞིག་ནས་བལྟས་པའི་གནས་སྟངས་ཤིག་རེད། ཚོགས་གཙོ་སྦྲེལ་པོ་དང་གྲོས་ཚོགས་འཐུས་མིའི་གོ་བསྡུར་སྐབས་ང་ཚོས་འདི་ནི་ལོ་རྒྱུས་ལྡན་པ་ཞིག་བྱུང་སོང་བསམ་པ་དང་། གྲོས་ཚོགས་འཐུས་མི་ནི་མི་མང་གི་སྐུ་ཚབ་ཡིན་སྟབས། མི་མང་གི་མངོན་འདོད་གཞིར་བཞག་ཐོག་གསོལ་བ་ཕུར་ཚུགས་སུ་འདེབས་པའི་གྲོས་ཆོད་ཅིག་འཇོག་ཐུབ་པ་དེ་ནི། ལོ་རྒྱུས་ནང་གལ་གནད་ཆེན་པོ་ཞིག་ཆགས་ཡོད་པར་ངོས་འཛིན་ཞུ་བཞིན་ཡོད། ཅེས་གསུངས་སོང་།

༧གོང་ས་མཆོག་གི་དགོངས་དོན་ཐག་གཅོད་གནང་སྟངས་ཐད། ཕྱི་ཚེས་ ༡༩ ཉིན་གྲོས་ཆོད་གང་བཞག་པ་དེ་སྐུ་སྒེར་དྲུང་ཆེ་བརྒྱུད་༸གོང་ས་མཆོག་ལ་སྙན་སེང་ཞུས་པ་དང་། ༸གོང་ས་མཆོག་གིས་གྲོས་ཆོད་དེ་ངོས་ལེན་མ་གནང་བའི་ཐོག་ནས་གསུང་འཕྲིན་རིན་པོ་ཆེའི་ནང་གང་འཁོད་པ་དེར་འགྱུར་བ་མེད་ཅེས་བཀའ་ཕེབས་པའི་ཐོག ཕྱི་ལོགས་སུ་སྒྲོ་བཏགས་ཏེ་༸གོང་ས་མཆོག་གིས་ཆབ་སྲིད་ཀྱི་རྩེད་མོ་རྩེད་བ་དང་ཟློས་གར་འཁྲབ་བཞིན་པའི་སྐོར་བཤད་པ་མ་ཡིན་པར། ༸གོང་ས་མཆོག་སྐུ་སྒེར་ངོས་ནས་ཐུགས་ཐག་ཆོད་པོས་ཐོག་ནས་བཀའ་ཕེབས་ཡོད་སྟབས། གྲོས་ཚོགས་ཀྱི་ངོས་ནས་གྲོས་ཆོད་ལ་བསྐྱར་ཞིབ་མི་བྱ་ཐབས་མེད་བྱུང་བ་ལས། གྲོས་ཚོགས་དང་བཀའ་ཤག་གི་ངོས་ནས་དགའ་དགའ་སྤྲོ་སྤྲོའི་ཐོག་ནས་དང་ལེན་ཞུས་པ་ཞིག་རྩ་བ་ནས་ཆགས་མེད། ཅེས་གསུང་བྱུང་།

མཐའ་མར་ཁོང་གིས། ཕྱོགས་གཅིག་ནས་༸གོང་ས་མཆོག་བགྲེས་ཡོལ་དུ་ཕེབས་པའི་དགོངས་གཞི་དེར་ང་ཚོ་བློ་ཕམ་ཆེན་པོ་ཡོད་པ་ཞིག་དང་། ཕྱོགས་གཞན་ཞིག་ནས་སྐབས་བཅུ་བཞི་པའི་འགན་འཁུར་དགོས་པ་དེ་འཁུར་ཐུབ་སོང་བསམ་པའི་ཚོར་སྣང་ཐོག་མཇུག་བསྡུ་བའི་མཚམས་སུ་བསླེབས་ཡོད་ཀྱང་། ད་ལྟའང་ལས་རིམ་དེ་མཇུག་སྒྲིལ་མེད་པར། བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་ཞིག་བསྐྱར་དུ་བཙུགས་ཏེ། ཕྱི་ཟླ་ ༤ པའི་ཚེས་ ༡༡ ལ་ཚོགས་དྲུང་ལས་ཁུངས་སུ་འབུལ་ཐུབ་པ་དགོས་པ་དང་། དེའི་ཐོག་སྤྱི་འཐུས་རྒྱུན་ལས་དང་བཀའ་ཤག་ལྷན་རྒྱས་ལ་གོ་བསྡུར་ཞུ་དགོས་པ་ཞུས་ཏེ། གྲོས་ཆོད་བཞག་པ་གཞིར་བཟུང་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་དེ་ཕྱི་ཟླ་ ༥ པའི་བདུན་ཕྲག་གསུམ་པའི་ནང་ཚུན་འཚོགས་ཐུབ་རྒྱུར་ཚོགས་གཙོ་སྦྲེལ་པོ་དང་ཚོགས་དྲུང་ལས་ཁུངས་ཀྱིས་ཧུར་བརྩོན་བྱ་རྒྱུ་ཡིན། དེའི་བྱུང་རིམ་ཆ་ཚང་མང་ཚོགས་ནང་མཁྱེན་རྟོགས་ཡོང་ཆེད། བཀའ་ཤག་གི་ངོས་ནས་གང་མགྱོགས་༸གོང་ས་མཆོག་གིས་གསུང་འཕྲིན་ཕེབས་པའི་ལོ་རྒྱུས་སྙིང་བསྡུས་ཤིག་དེབ་ཐེར་དུ་བཀོད་དེ། ས་གནས་ཚང་མར་འགྲེམས་ཐུབ་པ་དང་བོད་ནང་གི་བོད་མི་ཚོར་གསལ་བོ་བཟོ་ཐུབ་པ་བྱ་རྒྱུ་དང་། གྲོས་ཚོགས་ནང་གི་གནད་དོན་མང་པོ་ཞིག་མང་མོས་བྱེད་ཐུབ་ཀྱི་མེད་པའི་གནས་སྟངས་ལ་གཟིགས་ཏེ། མ་འོངས་གྲོས་ཚོགས་ཚོགས་དུས་འཕར་མའི་སྟེང་སྤྱི་འཐུས་ཚང་མས་ཆ་ཤས་ལེན་རྒྱུ་དང་འཛོམ་ཐུབ་པ་བྱ་རྒྱུར་འབོད་སྐུལ་ཞུ་བཞིན་ཡོད། ཅེས་གསུངས་སོང་།

གསར་འགོད་པ། དོན་གོ

༸གོང་ས་མཆོག་གི་གསུང་འཕྲིན་ཉམ་ལེན་ཞུ་ཕྱོགས་ལས་འཆར་ཚོགས་ཆུང་གི་སྙན་ཐོ།

2011-03-23T21:42:54Z

༈ ལས་འཆར་ཚོགས་ཆུང་གི་རྒྱབ་གཉེར་སྙན་ཐོ།

༄༅།། དཔལ་ལྡན་བཽད་མི་མང་སྤྱི་འཐུས་ལྷན་ཚོགས་ཀྱི་བཀུར་འོས་ཚོགས་གཙོ་མཆོག་གིས་ཕྱི་ལོ་ ༢༠༡༡ ཟླ་ ༣ ཚེས་ ༢༡ ལ་བསྩལ་བའི་བཀོད་ཁྱབ་ཨང་ ༡༨།༢༠༡༡།༥༡༩༤ ནང་གསལ། སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༡ པའི་ཐོག་སྤྱི་མོས་ཀྱིས་གཏན་འབེབས་གནང་བའི་གཞུང་འབྲེལ་གྲོས་ཆོད་ཡིག་ཆ་ཨང་ ༡༥ འཁོད་པའི་དགོངས་དོན་ཚོགས་ཆུང་གི་མི་འགྲོར། བཀའ་བློན་ཁྲི་པ་ཟམ་གདོང་བློ་བཟང་བསྟན་འཛིན་དང༌། བོད་མི་མང་སྤྱི་ལྷན་ཚོགས་གཞོན་རྒྱ་རི་སྒྲོལ་མ། བོད་མི་མང་སྤྱི་འཐུས་ཆབ་བྲག་ལྷ་མོ་སྐྱབས་བཅས་ལ་བསྐོ་གཞག་གནང་སྟེ་ལས་འཆར་ཚོགས་ཆུང་ནས་ྋསྤྱི་ནོར་གོང་ས་ྋསྐྱབས་མགོན་ཆེན་པོ་མཆོག་གི་གསུང་འཕྲིན་རིན་པོ་ཆེའི་དགོངས་དོན་ཉམས་ལེན་ཞུ་ཕྱོགས་ཀྱི་འཆར་གཞི་ཞིབ་ཕྲ་ཞིག་བཀོད་དེ་འདི་ཟླའི་ཚེས་ ༢༣ ནས་འགྱངས་མེད་སྤྱི་ལྷན་ཚོགས་དྲུང་ལས་ཁུངས་སུ་ངེས་འབུལ་ཐུབ་པ་དགོས་རྒྱུ་ཞེས་གསལ་བ་བཞིན། ཕྲན་ཚོགས་མི་གསུམ་ནས་འདི་ཟླའི་ཚེས་ ༢༡ ཕྱི་དྲོ་ཚོུད་ ༢ཿ༤༥ ནས་འགོ་འཛུགས་ཀྱིས་བསམ་ཞིབ་གོ་བསྡུར་ཞིབ་ནན་ཞུས་པའི་ལས་རིམ་འཆར་གཞི་རྒྱབ་གཉེར་སྙན་ཐོ་འགོད་འབུལ་ཞུས་པ་གཤམ་གསལ།

གཞིས་བྱེས་བོད་མི་ཡོངས་ཀྱི་བློ་ཡུལ་དུ་ཤོང་དཀའ་བའི་གསུང་འཕྲིན་རིན་པོ་ཆེའི་ནང་ བྱབྱད་ཆ་རང་རེའི་མང་གཙོའི་འཕེལ་རིམ་ཡོངས་སུ་རྫོགས་པའི་ཆེད་དུ་ྋརྒྱལ་བ་རིན་པོ་ཆེས་བོད་ཀྱི་ཆབ་སྲིད་ཀྱི་འགན་ཁུར་མ་དགོས་པར་མི་མང་གིས་འོས་འདེམས་བྱས་པའི་འགོ་ཁྲིད་སོ་སོས་ཆབ་སྲིད་ཀྱི་དབང་ལུང་ཡོངས་རྫོགས་འགན་ཁུར་བྱེད་དགོས་པའི་དུས་ལ་བབས་ཡོད།བྱབྱ ཅེས་དང༌། ཡང་ བྱབྱདཻར་བརྟེན་ད་ལམ་བཅའ་ཁྲིམས་བསྐྱར་བཅོས་སྐབས་བཅའ་ཁྲིམས་ཀྱི་སྒྲོམ་གཞི་ལ་འགྱུར་བ་བཏང་ནས་ཆབ་སྲིད་དང་འཛིན་སྐྱོང་གཉིས་ཀའི་འགོ་ཁྲིད་མང་ཚོགས་ཀྱིས་འོས་འདེམས་བྱས་པའི་མི་སྣས་དུས་ཡུན་ངེས་ཅན་དུ་བྱ་རྒྱུའི་ཆ་རྐྱེན་བསྐྲུན་ཏེ་བཅའ་ཁྲིམས་ཡུལ་མིའི་རྒྱལ་ཁབ་ཀྱི་སྒྲོམ་གཞི་དང་མཐུན་པ་ཞིག་ངེས་པར་བཟོ་དགོས་ཤིང༌། དེའི་འོག་རྗེས་འབྲེལ་དོན་ཚན་གཞན་དག་དང༌། ཁྲིམས་སྒྲིག་གཞན་ཁག་བསྐྱར་བཅོས་བྱ་རྒྱུའི་ཆེད་ཚོགས་ཆུང་ཟུར་འཛུགས་སམ་ལས་རིམ་ཇི་དགོས་ཚོགས་དུས་འདི་རང་དུ་གཏན་འབེབས་ལག་བསྟར་ངེས་པར་དུ་ཐུབ་པ་དགོས་རྒྱུ།བྱབྱ ཞེས་དང༌། ཡང་ བྱབྱབོད་དོན་བདེན་མཐའ་མ་གསལ་བར་བཙན་བྱོལ་བོད་མྀའི་སྒྲིག་འཛུགས་འདི་རྒྱུན་གནས་ཐུབ་པ་དང༌། བོད་མིའི་དྲང་བདེན་གྱི་འཐབ་རྩོད་རྒྱུན་སྐྱོང་ཐུབ་པ་ཞིག་དགོས་གལ་ཤིན་ཏུ་ཆེ་ཞིང་བྱབྱ ཞེས་ཕེབས་པ་མ་ཟད། སྐབས་ ༡༤ པའི་བོད་མི་མང་སྤྱི་འཐུས་ལྷན་ཚོགས་ཀྱིས་ྋགོང་ས་མཆོག་ལ་བོད་མིའི་ཆབ་སྲིད་ཀྱི་དབུ་ཁྲིད་སྔར་བཞིན་རྒྱུན་སྐྱོང་ཡོང་བའི་གསོལ་འདེབས་གྲོས་ཆོད་ཀྱང་དགོངས་བཞེས་མ་གནང་བར་ཕྱིར་སློག་གནང༌། དེ་མཚུངས་འདི་ཟླའི་ཚེས་ ༡༩ སྔ་དྲོ་ཆོ་འཕྲུལ་སྨོན་ལམ་ཆེན་མོའི་གསུང་ཆོས་སྐབས་སླར་ཡང་བཀའ་སློབ་གསུང་གི་བདུད་རྩི་ཟབ་ནན་ཕེབས་པ་བཅས་ལ་བརྟེན། ད་ཆ་གསུང་འཕྲིན་ཇི་ཕེབས་ཀྱི་དགོངས་དོན་རྣམས་ཉམས་ལེན་ལག་བསྟར་ཞུ་རྒྱུ་ལས་མ་འདས་ཤིང༌། ྋགོང་ས་མཆོག་གི་གསུང་འཕྲིན་ནང་ བྱབྱངོས་ཀྱི་སྲིད་དབང་རྩིས་སྤྲོད་བྱ་རྒྱུའི་བསམ་ཚུལ་འདི་འགན་ཁུར་བྱེད་འདོད་མེད་པ་དང༌། སེམས་ཤུགས་ཆག་པ། བོད་མིའི་བདེན་དོན་འཐབ་རྩོད་བློས་བཏང་བ་ཞིག་གཏན་ནས་མ་ཡིན་པར་བོད་མིའི་འཕྲལ་ཕུགས་ཀྱི་ཁེ་ཕན་ཁོ་ནའི་ཆེད་དུ་དམིགས་པ་ཞིག་ཡིན།བྱབྱ ཞེས་གསུངས་པ་ལྟར། ད་རེས་སྐབས་ ༡༤ པའི་གྲོས་ཚོགས་ཀྱིས་བཀའ་དགོངས་ཉམས་ལེན་ཞུ་རྒྱུ་བསོད་བདེ་དམན་པ་ཞིག་ཏུ་མི་བརྩི་བར་བྱུང་རབས་ཀྱི་དོན་སྙིང་ལྡན་པའི་གོ་སྐབས་ཤིག་ཏུ་བརྩིས་ཏེ།

ཀ༽ ཕྱོགས་གཅིག་ནས་ྋགོང་ས་མཆོག་གི་བཀའི་ཕེབས་སྒོ་གཞིར་བཟུང་བཅའ་ཁྲིམས་རིན་པོ་ཆེའི་སྒྲོམ་གཞི་ལ་འགྱུར་བ་གཏོང་བའི་བསྐྱར་བཅོས་དང་འབྲེལ་འོས་འདེམས་བྱས་པའི་འགོ་ཁྲིད་རྣམས་ཀྱིས་ཆབ་སྲིད་དང་འཛིན་སྐྱོང་གཉིས་ཀའི་འགན་ཁུར་ཆ་ཚང་ཐུབ་པའི་ཆ་རྐྱེན་བསྐྲུན་རྒྱུ་དང༌།

ཁ༽ དེ་དང་ཆབས་ཅིག་ཕྱོགས་གཞན་ནས་གསུང་འཕྲིན་རིན་པོ་ཆེའི་ནང་ བྱབྱངོས་རང་བོད་ཀྱི་ཡུལ་མི་ཞིག་ཡིན་པ་དང༌། བོད་མི་རིགས་དང་རྒྱལ་དབང་སྐུ་ཕྲེང་དབར་ལས་སྨོན་གྱི་འབྲེལ་བའི་དབང་གིས་རྒྱ་ཆེའི་མང་ཚོགས་ཚང་མའི་ཡིད་ཆེས་བློ་གཏད་ཡོད་པ་དེ་སྲིད་དུ་ངོས་ནས་བོད་ཀྱི་བསྟན་སྲིད་སྤྱི་དོན་ཡལ་བར་འདོར་མི་སྲིད་ཅིང༌།བྱབྱ ཞེས་པའི་ཞལ་བཞེས་བཟང་པོ་ལ་འཁྲིལ་ཏཻ་ྋགོང་ས་ྋསྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་གཞིས་བྱེས་བོད་རིགས་ཡོངས་ཀྱི་བླ་ན་མེད་པའི་སྐྱབས་མགོན་དང༌། བླང་དོར་ལམ་སྟོན་པའི་མཛད་ཁུར་རྒྱུན་སྐྱོང་ཡོང་བའི་གསོལ་འདེབས་ཞུ་རྒྱུའི་བརྒྱུད་ལམ་གསར་པ་ཞིག་འཚོལ་ཐུབ་པའི་ཐབས་ཤེས་གནང་དགོས་པའི་རྒྱབ་གཉེར་ཞུ་རྒྱུ་ཡིན།

ཀ༽ བཅའ་ཁྲིམས་བསྐྱར་བཅོས་ཞུ་ཕྱོགས་ཐད། གསུང་འཕྲིན་རིན་པོ་ཆེའི་དགོངས་དོན་བཞིན་ྋགོང་ས་མཆོག་གི་སྐུ་དབང་དང་མཛད་འགན་ཁག་ཁྲིམས་ཞིབ་པ་དང༌། བཀའ་བློན་ཁྲི་པ། སྤྱི་འཐུས་གྲོས་ཚོགས། སྤྱི་འཐུས་ཚོགས་གཙོ་བཅས་ལ་གང་ལ་ཇི་འོས་ཆ་བགོས་དང༌། སྡེ་སྲིད་ལྷན་ཚོགས་ཀྱི་ཆ་རྐྱེན་ཁག་ཕྱིར་བསྡུ་བྱ་རྒྱུ། སྔོན་གླེང་དང༌། ྋགོང་ས་མཆོག་གི་སྐོར་དོན་ཚན་གཅིག་གསར་སྣོན་བྱ་རྒྱུ། དེ་དང་ཆབས་ཅིག་བཙན་བྱོལ་སྒྲིག་འཛུགས་རྒྱུན་གནས་ཡོང་སླད་ད་ལན་བསྐྱར་བཅོས་འདི་མཉམ་ཡུལ་ཁྲིམས་དང་སྲིད་དོན་གྱི་ཐོག་ནས་འབྱུང་འགྱུར་སྐུ་ངལ་འཕྲད་གཞིའི་མིང་ཚིག་རེ་ཟུང་ཡོད་པ་རྣམས་ཀྱང་ཆབས་ཅིག་བསྐྱར་བཅོས་ཐུབ་ན་བཀའ་དགོངས་དང་མཐུན་པ་ཡོང་རྒྱུ། བཅའ་ཁྲིམས་བསྐྱར་བཅོས་མཛད་ཕྱོགས་སྐོར་རགས་ཟིན་ཟུར་འཛར་དང་པོར་ཕུལ་ཡོད།

ཁ༽ ྋགོང་ས་ྋསྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་བོད་རིགས་ཡོངས་ཀྱི་བླ་ན་མེད་པའི་སྐྱབས་མགོན་དང་བླང་དོར་ལམ་སྟོན་པའི་མཛད་ཁུར་རྒྱུན་སྐྱོང་ཡོང་བའི་གསོལ་འདེབས་ཞུ་རྒྱུ་དང༌། གཞི་རྩའི་བཅའ་ཁྲིམས་བསྐྱར་བཅོས་ཐོག་གཞི་རིམ་མང་ཚོགས་ཀྱི་བསམ་ཚུལ་བསྡུ་རྒྱུའི་ཆེད་དམིགས་བསལ་ཚོགས་ཆེན་ཞིག་གམ། བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་ཞིག་སྐབས་ ༡༤ པའི་སྤྱི་འཐུས་ལས་དུས་མ་རྫོགས་གོང་བསྡུ་བསྐོང་ཐོག སྐབས་ ༡༥ པའི་སྤྱི་འཐུས་འོས་འདེམས་གསལ་བསྒྲགས་ཐོན་པ་རྣམས་ཀྱང་མཉམ་ཞུགས་ཀྱིས་མང་ཚོགས་དང་ལྷན་དུ་བཅའ་ཁྲིམས་བསྐྱར་བཅོས་ཀྱི་ཚིག་བརྗོད་རྣམས་བགྲོ་གླེང་མཐིལ་ཕྱིན་གནང་སྟེ། མོས་མཐུན་བྱུང་མཚམས་ྋགོང་ས་མཆོག་ལ་བཅའ་ཁྲིམས་བསྐྱར་བཅོས་ཟིན་བྲིས་སྤྱན་ཞུ་དང་འབྲེལ་གསོལ་འདེབས་ཨུ་ནན་ཞུ་རྒྱུ། སྔོན་གླེང་དང༌། དོན་ཚན་དང་པོ་གསར་བཅུག་གི་རགས་ཟིན་ཟུར་འཛར་གཉིས་པར་ཕུལ་ཡོད།

ྋགོང་ས་མཆོག་གིས་ཞལ་བཞེས་བྱུང་མཚམས་སྐབས་ ༡༤ པའི་སྤྱི་འཐུས་ཀྱི་གྲོས་ཚོགས་འཕར་མ་ཞིག་གམ། ཡང་ན་སྐབས་ ༡༥ པའི་སྤྱི་འཐུས་དམ་འབུལ་ཟིན་འཕྲལ་ཚོགས་དུས་འཕར་མ་ཞིག་ཚོགས་ཏེ་བཅའ་ཁྲིམས་བསྐྱར་བཅོས་ཡོངས་རྫོགས་སྤྱི་མོས་ཀྱི་ཐོག་ནས་གཏན་འབེབས་ཡོང་ཐབས་གནང་རྒྱུ་དང༌། གཏན་འབེབས་ཟིན་འཕྲལ་ྋགོང་ས་ྋསྐྱབས་མགོན་ཆེན་པོར་ཆོག་མཆན་ཞུས་རྗེས་རྩ་འཛིན་གནང་རྒྱུ།

ཡང་ན། བཅའ་ཁྲིམས་བསྐྱར་བཅོས་ཀྱི་ཟིན་བྲིས་སྐབས་ ༡༤ པའི་གྲོས་ཚོགས་ནས་མོས་མཐུན་བྱུང་བ་དེ་དག་ས་གནས་འཐུས་ཚོགས་དང༌། རང་བདེན་ཚོགས་ཆུང༌། བོད་རིགས་སྤྱི་མཐུན་ཚོགས་པ་སོགས་བརྒྱུད་འགྲེམས་སྤེལ་གྱིས་མང་ཚོགས་ཀྱི་བསམ་ཚུལ་བསྡུ་རུབ་གནང་རྒྱུ་ཇི་དགེའི་བཀའ་བསྡུར་གྱིས་གདམ་ཁ་གང་ཡང་རུང་བ་ཞིག་ལ་གཏན་འབེབས་ཀྱིས་ཚོགས་ཆུང་བསྐོ་འཛུགས་ཀྱིས་མཚོན་ལས་འཆར་གང་ཡིན་འཕྲལ་དུ་འགོ་འཛུགས་གནང་རྒྱུ། གལ་གནད་ཆེ་ཤོས་ནི་བཅའ་ཁྲིམས་བསྐྱར་བཅོས་ཀྱི་ཟིན་བྲིས་རགས་པ་ཙམ་ད་ལན་ཚོགས་དུས་འདི་ཐོག་ཐུགས་གཏན་འཁེལ་བ་དགོས་གལ་ཆེ་བ་མ་ཟད། མཐའ་མའི་གཏན་འབེབས་སྤྱི་འཐུས་སྐབས་ ༡༤ དང་ ༡༥ སུས་གནང་རྒྱུའི་ཐག་གཅོད་ཀྱིས་གང་ལྟར་ ༢༠༡༡ ཕྱི་ཟླ་ ༦ པའི་ཚེས་ཤར་ལ་བཅའ་ཁྲིམས་བསྐྱར་བཅོས་ལས་རིམ་གྲུབ་པ་གནང་གལ་ཆེ་བ་བཅས་ཀྱི་རྒྱབ་གཉེར་སྙན་ཞུར། ལས་འཆར་ཚོགས་ཆུང་ཐུན་མོང་གིས་ཕྱི་ལོ་ ༢༠༡༡ ཟླ་ ༣ ཚེས་ ༢༣ ལ་ཕུལ།།

༡། བཀའ་བློན་ཁྲི་པ་ཟམ་གདོང་བློ་བཟང་བསྟན་འཛིན། ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་ ༢། བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ། ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་ ༣། བོད་མི་མང་སྤྱི་འཐུས་ཆབ་བྲག་ལྷ་མོ་སྐྱབས།

གསུམ་བཅུའི་དུས་དྲན་ཐེངས་ ༥༢ པའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད།

2011-03-17T17:09:44Z

མི་ལོ་ ༥༢ གོང་གི་དེ་རིང་གི་ཉིན་མོར། བཙན་འོག་ཏུ་བཞག་པའི་གྲོས་མཐུན་དོན་ཚན་བཅུ་བདུན་གྱི་རྨང་གཞིའི་སྟེང་བོད་གཞུང་ནས་བོད་རྒྱ་མཉམ་གནས་ཀྱི་འབད་བརྩོན་རིམ་པར་བསྟེན་ཀྱང་། བོད་འབྱོར་རྒྱ་དམག་གིས་བཙན་འཛུལ་བའི་གདོང་རིས་དམར་རྗེན་དུ་བཏོན་ཏེ། གྲོས་དོན་བརྡལ་བཤིག་གི་སྦྱོར་ངན་ཡ་ང་བག་ཚ་མེད་པར་བརྩམས་པ་དང་། ཐ་ན་སྤྱི་ནོར་༸གོང་ས་༸སྐྱབས་མགོན་ཆེན་པོའི་སྐུ་ཕྱྭར་བསྡོ་བའི་གྲབས་གཤོམ་བྱས་སྟབས། འ་ཆད་འུ་ཐུག་པའི་ཆོལ་གསུམ་བོད་མི་རྣམས་ནས་རྒྱལ་ས་ལྷ་སར་བོད་རང་དབང་རང་བཙན་སླར་གསོའི་འབོད་ཚིག་བསྒྲགས་ཏེ། བཙན་རྒོལ་རྒྱལ་སྐྱོབ་ཀྱི་ལས་འགུལ་གཞི་རྒྱ་ཆེན་པོ་ཞིག་སྤེལ་ཡོད། དུས་དེ་ནས་བཟུང་། རྒྱ་གཞུང་གིས་བོད་ནང་དྲག་གནོན་རྡུང་རྡེག་དང་དྲག་ཆར་རླུང་འཚུབ་ལྟ་བུའི་ཆབ་སྲིད་ཀྱི་ལས་འགུལ་རབ་དང་རིམ་པར་སྤེལ་ཏེ། བོད་མི་འབུམ་བཅུ་གཉིས་ཙམ་དུས་མིན་རྐྱེན་འདས་སུ་བཏང་བ་མ་ཟད། ཆོས་ཀྱི་བསྟི་གནས་དགོན་སྡེ་དྲུག་སྟོང་ལྷག་རྨེག་མེད་དུ་གཏོར་བཅོམ་གྱིས་མཚོན། བོད་ཀྱི་སྣོད་བཅུད་གཉིས་ལ་ཆག་སྒོ་ལོ་རྒྱུས་སུ་མ་གྲགས་པ་ཞིག་བྱུང་ཡོད་པས། དཀའ་སྡུག་གི་འདས་ཟིན་པའི་བྱུང་བ་དེ་རྣམས་ཡིད་ཡུལ་ནས་མ་བོར་བར་སེམས་ལ་འཆང་དགོས་པ་དང་། བསྟན་སྲིད་མི་རིགས་ཀྱི་ཆེད་དུ་ལུས་སྲོག་ལོངས་སྤྱོད་ཡོངས་སུ་བློས་བཏང་བའི་དཔའ་བོ་དཔའ་མོ་ཚོར་རྗེས་དྲན་ཞུ་དགོས་པའི་དུས་ཚེས་ཤིག་ཡིན། དེ་བཞིན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་མགོན་པོ་གང་གི་ཕེབས་རྗེས་སུ་འབྲངས་པའི་བོད་མི་བརྒྱད་ཁྲི་ཙམ་དུས་མཚམས་འདི་ནས་རྒྱ་གར་འཕགས་པའི་ཡུལ་དུ་བཙན་བྱོལ་ལ་ཕེབས་ཏེ། བཙན་བྱོལ་བོད་གཞུང་གསར་འཛུགས་དང་། གཞིས་སྒར་དང་སློབ་གྲྭ། ཆོས་སྡེ་སོགས་འཛིན་སྐྱོང་གི་ཐབས་ཚུལ་རྨད་དུ་བྱུང་བ་བསྐྱངས་པས། ད་ཆ་བོད་དོན་བདེན་པའི་འཐབ་རྩོད་ཀྱི་འབོད་སྒྲ་འཛམ་གླིང་ས་ཆེན་ཧྲིལ་པོར་འགེང་བཞིན་པའི་གནས་བབ་བསྐྲུན་ཐུབ་ཡོད་པའི་གྲུབ་འབྲས་ལ་ཡི་རང་དགའ་སྒོམ་དང་འབྲེལ། གཙོ་ཆེར་སྤྱི་ནོར་༸གོང་ས་༸སྐྱབས་མགོན་དོན་གྱི་བདག་པོ་མཆོག་དང་། སྐབས་དུས་དེ་དག་གི་རྒན་རབས་པ་ཚོའི་འབད་བརྩོན་དང་བློས་གཏོང་གི་སྙིང་སྟོབས་བཅས་ལ་བཀའ་དྲིན་རྗེས་དྲན་ཞུ་དགོས་པ་ཞིག་ཀྱང་ཡིན། དེང་འཛམ་གླིང་ནང་དངུལ་ལོར་དང་དཔལ་འབྱོར་ཡོ་འཁྱོམ་གྱི་རྦ་ཀློང་དྲག་ཏུ་འཕྱོ་བཞིན་པའི་སྐབས་འདིར། རྒྱ་ནག་གིས་ལོ་ངོ་བཅུ་ཕྲག་དུ་མའི་རིང་རྒྱལ་ནང་ཐོན་སྐྱེད་ཀྱི་རིན་ཐང་སྡོམ་འབོར་རྒྱུན་མཐུད་འཕར་སྐྱེད་ཕྱིན་པའི་གྲུབ་འབྲས་ངོམ་འཕྱར་གྱིས་རྒྱལ་སྤྱིའི་ཆབ་སྲིད་སྡིངས་ཆའི་སྟེང་འཇམ་རྩུབ་ཀྱི་ཉམས་འགྱུར་སྟངས་སྟབས་ཅི་རིགས་སྟོན་པ་དང་། གལ་འགངས་ཆེ་བའི་རྒྱལ་སྤྱིའི་གནད་དོན་ཐོག་མཉམ་ཞུགས་དང་བསམ་འཆར་གླེང་སློང་གི་འབད་པ་བསྟེན་བཞིན་པར་མ་ཟད། ཕྱི་རྒྱལ་ཡུལ་གྲུ་དབར་རིག་གཞུང་བརྗེ་རེས་དང་འབྲེལ་གཏུགས། རྒྱ་ནག་གི་རིག་གནས་ཁྱབ་སྤེལ་སོགས་ཀྱི་སྒོ་ནས་རྒྱལ་ཁབ་ཀྱི་ཆེ་མཐོང་དང་སྣང་བརྙན་བསྐྲུན་ཐབས་བྱེད་པ་ནི་རྒྱལ་ཁབ་ཆེན་པོ་ཞིག་ལ་ཡོད་དགོས་པའི་བྱ་སྤྱོད་ཅིག་ཡིན་ངེས་ཀྱང་། གཏམ་བཤད་ཀྱི་ཐོབ་ཐང་གླེང་སྐབས་མདུན་གྲལ་ནས་རྒྱལ་ཁབ་ཆེན་པོའི་ངོ་སོ་རྩོད་པ་དང་། འགན་ཁུར་ཆ་བགོས་བྱེད་སྐབས་རྒྱབ་གྲལ་ནས་རང་ཉིད་ད་དུང་ཡར་རྒྱས་འགྲོ་བཞིན་པའི་རྒྱལ་ཁབ་ཡིན་ལུགས་གཡོལ་ཐབས་བྱས་ཏེ། ངལ་རྩོལ་པའི་གླ་དོད་དང་ཐོན་ཁུངས་ཀྱི་མ་རྩ་དམའ་བོར་བརྟེན་པའི་འཛམ་གླིང་གི་བཟོ་གྲྭའི་མིང་ཐོགས་དེ་ཙམ་ཞིག་ད་དུང་དོན་དམ་གྱི་སྟོབས་ལྡན་རྒྱལ་ཁབ་དང་ཁད་ཐག་རིང་པོར་གྱེས་ཡོད་པ་སྨོས་མ་དགོས། ལྷག་པར་དུ་རྒྱ་གུང་ཁྲན་སྲིད་གཞུང་གིས་དམར་ཤོག་ཚོགས་པ་གཅིག་གི་སྲིད་དབང་སྒེར་སྡོམ་མུ་མཐུད་གནས་ཐབས་སུ། སྒྲིག་འཛུགས་དང་དྲིལ་བསྒྲགས། འཐབ་ཕྱོགས་གཅིག་གྱུར་གྱི་བྱེད་ཐབས་སྤྱད་དེ། རང་དབང་ཡུལ་གྲུའི་ནང་གཞི་རྩའི་རིན་ཐང་དུ་ལོངས་སུ་སྤྱོད་བཞིན་པའི་མང་གཙོ་དང་། རང་དབང་། ཁྲིམས་ལུགས་དབང་བསྒྱུར། འགྲོ་བ་མིའི་ཐོབ་ཐང་བརྩི་སྲུང་བཅས་ལ་རྒྱབ་ཀྱིས་ཕྱོགས་ཏེ། སྤྱི་ཚོགས་ཀྱི་གཞི་རིམ་དཀའ་རྙོག་རྣམས་སེལ་རྒྱུའི་ཁྲིམས་མཐུན་ལུགས་མཐུན་གྱི་ཐབས་ཤེས་མ་བསྟེན་པར། བརྟན་ལྷིང་སྲུང་སྐྱོབ་ལ་རྒྱལ་སྲུང་ལས་ལྷག་པའི་འགྲོ་གྲོན་ནར་གཏོང་གིས། གཞུང་དང་ལྟ་བ་མི་མཐུན་པ་ཚོར་དྲག་གནོན་བཙོན་འཇུག་དང་། གྲངས་ཉུང་མི་རིགས་ས་ཁུལ་དུ་རྫོགས་རྒྱུ་མེད་པའི་ཁ་བྲལ་ལ་ངོ་རྒོལ། རྒྱལ་ཁབ་ཀྱི་ཐོན་ཁུངས་རྣམས་འབྱོར་ལྡན་ཚོང་པ་དང་དཔོན་རིགས་ཚོས་ཧམ་ཟོས་དང་ལྐོག་ཟ་རུལ་སུངས་རྒྱ་ཡན། དེ་བཞིན་དྲ་རྒྱ་དང་གསར་འགྱུར་བརྒྱུད་ལམ་འགོག་སྡོམ་དང་། ཆོས་ལུགས་དང་ཆོས་བྱེད་མི་སྣར་དགོས་མེད་ཀྱི་སྡང་ཟུག་བསུན་གཙེར་དང་དོ་དམ་སྟངས་འཛིན། སྤྱིའི་མི་འབོར་གྱི་བརྒྱ་ཆའི་དགུ་བཅུ་ཡན་ཟིན་པའི་རྒྱ་རིགས་ཚོར་མི་རིགས་རིང་ལུགས་ངར་སློང་བྱེད་པ་སོགས་ནི་དུས་རབས་ཉེར་གཅིག་པའི་འགྲོ་བ་མིའི་སྤྱི་ཚོགས་འཕེལ་རྒྱས་ཀྱི་ཁ་ཕྱོགས་ལས་ལྟག་ལོག་ཏུ་སོང་ཡོད། གླིང་ཆེན་ཨ་ཧྥེ་རི་ཀའི་བྱང་རྒྱུད་དང་། དབུས་ཤར་ཨེ་ཤ་ཡའི་ནང་མང་ཚོགས་ཀྱི་ཞི་རྒོལ་ལས་འགུལ་གཅིག་མཇུག་གཉིས་མཐུད་དུ་མཆེད་བཞིན་པ་དེས། འགྲོ་བ་མིའི་ཡོངས་ཁྱབ་རིན་ཐང་ལ་བརྩི་མཐོང་དགོས་པའི་བརྡ་ལན་གསལ་པོ་ཞིག་བསྟན་ཡོད་ཅིང་། དཔལ་ཡོན་གྱི་ལོ་རྒྱུས་ཡུན་རིང་ལྡན་པའི་རྒྱ་ནག་གི་ཡུལ་གྲུ་དེ་ཡང་སྲིད་དབང་སྒེར་འཛིན་པ་ཚོས་དྲག་ཤུགས་དང་བཙན་གནོན་གྱིས་ནམ་ཕུགས་འཁྱོལ་ཐབས་མེད་ལ། འཛམ་གླིང་སྤྱིའི་བགྲོད་ལམ་ལས་ལོགས་སུ་གྱེས་ཏེ་འགྲོ་ས་ཞིག་གཏན་ནས་ཡོད་མི་སྲིད། རྒྱ་གཞུང་གིས་ནུབ་ཁུལ་གསར་སྤེལ་གྱི་སྲིད་ཇུས་སྤེལ་ནས་ལོ་ཤས་རྗེས། ཤར་ནུབ་གཅིག་ཕན་གཅིག་གྲོགས་ཟེར་བའི་སྲིད་ཇུས་བཅོས་སྒྲིག་གིས། ད་ཆ་བོད་ས་ཡོངས་རྫོགས་ཐེ་བའི་ནུབ་རྒྱུད་ས་ཁུལ་ནས་རྒྱ་ནག་ཤར་རྒྱུད་ས་ཁུལ་ལ་རང་བྱུང་ཐོན་ཁུངས་དང་ལས་ཞུགས་ཀྱི་གོ་སྐབས་སོགས་མཐུན་འགྱུར་བྱེད་དགོས་པའི་འབོད་ཚིག་བསྒྲགས་ཡོད་པ་དང་། སྲིད་པ་ཆགས་པ་ནས་བཟུང་མི་ཐོག་རིམ་བརྒྱུད་མཚེར་ས་རེས་སྤོས་ཀྱིས་འཚོ་གནས་བྱེད་བཞིན་པའི་འབྲོག་པ་རྣམས་རོང་དུ་ཕབ་སྟེ་གྲོང་བརྡལ་བསྐྲུན་པ་དང་། གཞུང་གི་དགོས་མཁོ་ལྟར་ཁྱིམ་གཞིས་བརྗེ་སྤོ་བྱེད་པའི་སྐྱེ་ཁམས་གཞིས་སྤོས། མདོ་དབུས་ལྕགས་ལམ་དང་དེའི་འཕྲོ་མཐུད་ལས་འཆར། གཞུང་ལམ་དྲ་བ། གནམ་གྲུ་འབབ་ཐང་གསར་བཟོ་རྒྱ་བསྐྱེད། བོད་སྐྱོར་ལས་གཞི་ཟེར་བའི་ཁོངས་ཤེས་འཇོན་ཅན་དང་ལག་རྩལ་བོད་སྐྱོར་ཟེར་བའི་མིང་ཐོག་ནས་རྒྱ་ནང་གི་ཆུ་གློག་དང་གཏེར་རྫས། རྒྱལ་གཉེར་ཁེ་ལས་སོགས་ཀྱི་ཁྱད་ལས་པ་བོད་ཀྱི་རྫོང་དང་ཡུལ་ཚོ་རིམ་པའི་བར་གྱི་དམར་ཤོག་ཚོགས་པའི་འགན་འཛིན་དང་། འབྲེལ་ཡོད་སྡེ་ཚན་གྱི་འགོ་བྱེད་དུ་ཆེད་གཏོང་གིས། དེ་དག་གི་ཕ་ཡུལ་ཉེ་ལྟོས་རྒྱུད་འཛར་དང་བཅས་པ་དངོས་བརྒྱུད་ཅི་རིགས་ནས་ལས་ཞུགས་གཞིས་སྤོ། ལྷག་པར་དུ་རྒྱ་ནག་གི་གཞུང་གཉེར་གཏེར་སྔོག་སྡེ་ཚན་ནས་བོད་དུ་ཨེ་ཤ་ཡ་དང་རྒྱ་ནག་རྒྱལ་ཡོངས་ཀྱི་གསོག་ཚད་མཐོ་གྲས་སུ་སླེབས་པའི་རང་བྱུང་ཐོན་ཁུངས་འཚོལ་བཤེར་སྔོག་འདོན་དང་། རྒྱལ་གཉེར་གློག་ཤུགས་ལས་ཁང་ཆེ་ཤོས་བཞིས་བོད་ཀྱི་ཆུ་ཀླུང་ཆེ་ཁག་ཆ་བགོས་ཀྱིས་ཆུ་གློག་གསར་རྒྱག སྒེར་གཉེར་ཁེ་ལས་ཚོས་ཀྱང་བོད་ཀྱི་རི་ཀླུང་རྒྱན་རྩེད་ལྟར་མཚམས་ཚིགས་མེད་པར་སྔོག་བཤེར། ཐ་ན་སྐམ་གཤེར་དུ་གནས་པའི་རི་དྭགས་རྣམས་འདོད་རྔམས་ཀྱིས་བསད་བཟུང་ཚོད་མེད་དུ་བྱས་དང་བྱེད་བཞིན་པ་སོགས་ཀྱིས། ཕ་ཡུལ་གངས་ལྗོངས་ཀྱི་བྱིན་ཆགས་རང་བྱུང་བཀོད་པ་རྣམས་ཐེར་ཚལ་སྦར་ཚལ་བཟོ་རྒྱུར་ལོ་ངོ་ཅི་ཙམ་བརྟན་གྱི་ཡོད་ན་བསམ་པའི་དངངས་འཚབ་གྲང་ཤུར་རེར་འབྱུང་བ་དང་། ལས་གཞི་དེ་དག་དང་འབྲེལ་གྲོག་ཚང་བརྡོལ་བ་ལྟར་བོད་དུ་གནས་སྤོས་ལས་འཚོལ་གྱི་རྒྱ་རིགས་ཚོས་སྤྱི་ཚོགས་ཀྱི་ཐོན་ཁུངས་ཕལ་མོ་ཆེ་བདག་ཏུ་བཟུང་སྟེ། ས་སྐྱེས་རྡོ་སྐྱེས་ཀྱི་བོད་རིགས་ཞིང་འབྲོག་མང་ཚོགས་རྣམས་མཐར་འབུད་བཏང་ཡོད་པ་སོགས་ཀྱི་བབ་ལ་བལྟས་ན། ད་ནི་རྒྱ་གཞུང་གིས་བོད་ཀྱི་སྣོད་བཅུད་གཉིས་ཀ་རྩ་གཏོར་གཏོང་རྒྱུའི་ངན་ཇུས་འཇིགས་ཡེར་བ་ཞིག་བཏིང་དང་འདིང་བཞིན་པ་མངོན་གསལ་དུ་མཐོང་ཐུབ། དགོན་པ་དང་ཡང་སྲིད་དོ་དམ་གྱི་ཁྲིམས་དང་སྲོལ་ཡིག་འདྲ་མིན་གཏན་འབེབས་དང་། དགོན་སྡེ་ཁག་ཏུ་ལས་དོན་རུ་ཁག་ཆེད་བཙུགས་ཀྱིས་རྒྱལ་གཅེས་ཆོས་གཅེས་ཟེར་བའི་ལས་འགུལ་མུ་མཐུད་སྤེལ་བ་མ་ཟད། ད་དུང་དགོན་སྡེ་མང་པོ་ཞིག་ཏུ་སྤྱི་བདེ་མངགས་གཏོང་ཁང་ཟེར་བ་ཆེད་བཙུགས་ཀྱིས་དགོན་པའི་རྒྱུན་ལྡན་སྒྲིག་སྲོལ་ལ་ཐེ་གཏོགས་དང་གྲྭ་བཙུན་ཚོར་སྡིགས་སྐུལ་རྒྱུན་མར་བྱེད་པ་དང་། དགེ་སློབ་དང་ཤེས་ཡོན་ཅན་ཚོའི་སྐད་ཡིག་རང་དབང་གི་དགོས་འདུན་དང་རྒྱ་ནག་རང་གི་ཁྲིམས་སྒྲིག་ལ་ལྟོས་མེད་ཀྱིས་བོད་རིགས་ཀྱི་སློབ་གྲྭ་ཁག་ཏུ་སྔོན་འགྲོའི་འཛིན་གྲྭ་ནས་བཟུང་སྟེ་རྒྱ་ཡིག་གཙོ་བོར་སློབ་དགོས་པའི་སྲིད་ཇུས་བཙན་འགེལ། རྩོམ་པ་པོ་དང་གླུ་བ། ཁོར་ཡུག་སྲུང་སྐྱོབ་པ། གྲགས་ཅན་མི་སྣ་སོགས་ལ་བསུན་གཙེར་དང་། བཀག་བསྐྱིལ། དྲང་བདེན་གྱི་ཁྲིམས་བཤེར་མ་བརྒྱུད་པར་དུས་བཀག་བཙོན་འཇུག་དང་ཚེ་བཙོན་གྱི་ཁྲིམས་ཆད་བཏང་བ་མ་ཟད། གཅར་རྡུང་གིས་རྐྱེན་འདས་སུ་ཕྱིན་པ་དང་གཟུགས་གཅོང་དུ་གྱུར་པ། གར་སོང་ཆ་མེད་དུ་གྱུར་པའི་གནས་ཚུལ་ཡང་ཡང་ཐོན་ཡོད་ལ། ད་ལྟའི་ཆར་ཉུང་མཐར་ཡང་ཆབ་སྲིད་བཙོན་པ་ ༨༣༡ ཙམ་གྱིས་ཁྲིམས་མུན་དུ་མནར་གཅོད་མྱོང་བཞིན་ཡོད་པས། རྒྱ་ནག་གཞུང་གིས་དུས་ལས་ཡོལ་བའི་མི་སེར་སྤེལ་ཡུལ་རིང་ལུགས་པའི་བྱ་སྤྱོད་ཐ་ཤལ་དེ་རིགས་ལ་སྤྱི་འཐུས་ལྷན་ཚོགས་ནས་ཚོར་ཤུགས་དྲག་པོས་ངོ་རྒོལ་དང་། འཕྲལ་དུ་མཚམས་འཇོག་ཡོང་བའི་རྟིང་སྐུལ་བྱེད་ཀྱི་ཡོད། སྐྱེ་རྒུ་མདོའི་ས་ཡོམ་དང་འབྲུག་ཆུའི་འདམ་རུད་ཀྱི་གོད་ཆག་ཁྲོད་རྐྱེན་འདས་སུ་ཕྱིན་པ་རྣམས་ལ། བཙན་བྱོལ་བོད་གཞུང་མང་གི་ངོས་ནས་བསྔོ་སྨོན་དང་གདུང་སེམས་མཉམ་བསྐྱེད་ཀྱི་ཞལ་འདེབས་བསྡུ་འབུལ་ཞུས་ཡོད་པ་དང་། འབྱུང་བའི་བར་ཆད་འདི་བཟློག་ཏུ་མེད་པ་ཞིག་ཡིན་ཡང་། མིའི་བྱེད་ལས་ཀྱིས་འཐུས་ཤོར་ཕྱིན་པའི་རྒྱུ་རྐྱེན་གསལ་པོ་ཡོད་པ་མ་ཟད། རང་བྱུང་ཁོར་ཡུག་ལ་ཚད་ལས་བརྒལ་བའི་སྔོག་འདོན་གཏོར་སྐྱོན་བཏང་བའི་ཉེས་ནོངས་དེ་རིགས་ངོས་ཟིན་པའི་སྒོ་ནས་ཡིད་ཟོན་བྱེད་དགོས། སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་མཆོག་གིས་དབུ་ཁྲིད་མཛད་པའི་བོད་དོན་འཐབ་རྩོད་ནི། འཚེ་མེད་ཞི་བ་དམ་བཅར་བཟུང་ཞིང་། བདེན་དོན་གཞི་ལ་བཞག་སྟེ། བོད་དང་བོད་མིའི་བདེ་རྩ་བསྒྲུབ་རྒྱུར། བོད་རྒྱ་གཉིས་སྨན་གྱི་ལངས་ཕྱོགས་ནས་འཛམ་གླིང་གི་ཆབ་སྲིད་རྩོད་རྙོག་ལ་མིག་དཔེར་འོས་པའི་ཐབས་ལམ་ཞིག་འཚོལ་སྙེགས་བྱེད་པ་ཡིན་སྟབས། རྒྱལ་སྤྱིའི་ཁྱོན་དུ་སྲིད་གཞུང་དང་གྲོས་ཚོགས། གཞུང་འབྲེལ་མ་ཡིན་པའི་ཚོགས་པ་དང་། སྒེར་བ་ཁག་ནས་རྒྱབ་སྐྱོར་བྱེད་མཁན་ཉིན་རེ་བཞིན་ཇེ་མང་དུ་འགྲོ་བཞིན་པ་དང་། ད་ལྟའི་ཆར། རྒྱལ་སྤྱིའི་སྲིད་དོན་སྡིངས་ཆའི་སྟེང་། བོད་ཀྱི་གནད་དོན་ནི་འཛམ་གླིང་གི་དབུ་ཁྲིད་སུས་ཀྱང་གཡོལ་དུ་མེད་པའི་བརྗོད་གཞི་གལ་ཆེན་ཞིག་ཆགས་ཡོད། བཙན་བྱོལ་བོད་གཞུང་གི་ངོས་ནས་དུས་རབས་སྔ་མའི་ལོ་རབས་ ༨༠ ནས་བཟུང་རྒྱ་ནག་གཞུང་དང་མཉམ་དུ་གཉིས་སྨན་དབུ་མའི་ལམ་ནས་བོད་རྒྱའི་དཀའ་རྙོག་སེལ་ཐབས་སུ། ཞི་མོལ་གྱི་ཐབས་ཤེས་ལུ་གུ་རྒྱུད་དུ་བསྟེན་ཡོད་པ་དང་། ཕྱི་ལོ་ ༢༠༠༢ ནས་བསྐྱར་གསོ་བྱུང་བའི་འབྲེལ་མོལ་ཐེངས་ ༨ པའི་སྐབས། རྒྱ་ནག་གི་རྩ་ཁྲིམས་ཀྱི་ཆ་རྐྱེན་འོག བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་རྒྱ་ནག་གཞུང་ལ་སྤྲད་པ་མ་ཟད། ༢༠༡༠ ལོའི་ཟླ་ ༡ ནང་རྒྱ་ཕྱོགས་ཀྱི་འཁྱོག་བརྗོད་ཁག་ལ་ཡིག་ཐོག་ནས་འགྲེལ་བརྗོད་གནང་སྟེ། བོད་མིའི་དགོས་འདུན་རྣམས་གསལ་སྟོན་བྱས་ཡོད་ཀྱང་། རྒྱ་གཞུང་དབང་འཛིན་པས་ད་དུང་དུས་ཚོད་འགྱངས་ཐབས་ཀྱི་ཁག་དཀྲི་བྱེད་བཞིན་པར་བརྟེན། རྣམ་དཔྱོད་དང་བློ་གྲོས་ཀྱི་སྒོ་འཕར་ཡངས་པོར་ཕྱེས་ཏེ། དོན་ཕན་ལྡན་པའི་གྲུབ་འབྲས་འབྱུང་རྒྱུར་བློ་སྟོབས་བསྐྱེད་དགོས་པའི་སྐུལ་འདེབས་བྱ་རྒྱུ་ཡིན།

ཉིན་ཤས་རྗེས། བཀའ་ཤག་སྐབས་ ༡༤ པའི་བཀའ་བློན་ཁྲི་པ་དང་། སྤྱི་འཐུས་སྐབས་ ༡༥ པའི་འོས་བསྡུ་ཆེན་མོ་སླེབས་ཉེར་བརྟེན། བཙན་བྱོལ་བོད་མི་ཚོས་སོ་སོའི་འགན་དབང་དང་དུ་བླངས་ཏེ། མང་གཙོའི་དུས་སྟོན་ཆེན་མོ་འདིའི་འོས་འཕེན་ལ་མཉམ་ཞུགས་གནང་རོགས་ཞེས་གཞེན་སྐུལ་ཞུ་རྒྱུ་དང་། བོད་གཞུང་མང་རྒྱལ་ཡོངས་ཚོགས་ཆེན་ཐེངས་དང་པོ་ ༢༠༡༠ ཡི་མཐའ་དོན་བསམ་འཆར་ཕྱོགས་བསྡོམས་སྙན་ཐོའི་འབྲུ་དོན་རྣམས་ལག་ལེན་འགེལ་ཕྱོགས་ཐད། འབྲེལ་ཆགས་ཁུངས་སོ་སོས་མཇུག་གནོན་གནང་འོས་ཅི་འགབ་གཏན་འབེབས་ཀྱིས་རྒྱ་ཁྱབ་གསལ་བསྒྲགས་སོང་ཟིན་པ་ལྟར། ཕྱག་ལེན་གནང་དགོས་རིགས་གནང་དང་གནང་བཞིན་ཡོད་ཅིང་། དེ་དག་ལ་སྤྱི་སྒེར་ཚང་མས་ཐུགས་སྣང་ཡོང་བའི་རེ་སྐུལ་ཀྱང་ཞུ་གི་ཡོད། བོད་མི་རྣམས་བཙན་བྱོལ་དུ་འབྱོར་ནས་དུས་རབས་ཕྱེད་ལྷག་འགོར་བའི་སྐབས་འདིར། ང་ཚོར་ཕ་ཡུལ་གཉིས་པ་ལྟ་བུའི་མཐུན་འགྱུར་རོགས་རམ་གནང་མཁན་རྒྱ་གར་གཞུང་མང་གཉིས་དང་། བོད་དོན་ལ་རྒྱབ་སྐྱོར་གནང་མཁན་རྒྱལ་སྤྱིའི་གཞུང་སྒེར་ཚོགས་སྡེ་ཚང་མར་བཀའ་དྲིན་སྙིང་བཅངས་ཀྱིས་ཐུགས་རྗེ་ཆེ་ཞུ་རྒྱུ་དང། མཐའ་དོན། སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་མཆོག་འཛམ་གླིང་སྐྱེ་འགྲོ་སྤྱི་དང་གཞིས་བྱེས་བོད་མིའི་མགོན་དཔུང་དམ་པར་སྐུ་ཚེ་༸ཞབས་པད་བསྐལ་བརྒྱར་བརྟན་ཅིང་། སྔོན་གྱི་ཐུགས་བསྐྱེད་དམ་བཅའ་ལས་མི་འགོངས་བར། ཐུགས་སྟོབས་གོ་ཆ་བཙན་པོས་ད་ཡོད་མང་གཙོའི་འགྲོ་ལུགས་ལྟར་བོད་བསྟན་སྲིད་ཀྱི་མཛད་ཁུར་མུ་མཐུད་སྐྱོང་བཞེས་ངང་། གང་གི་གདུལ་ཞིང་གངས་ཅན་ལྗོངས་སུ་གང་མྱུར་༸ཞབས་སོར་མངོན་པར་བཀོད་དེ་གཞིས་བྱེས་ལྷན་འཛོམས་ཡོང་བའི་སྨོན་འདུན་དང་བཅས། བོད་མི་མང་སྤྱི་འཐུས་ལྷན་ཚོགས་ནས་ཕྱི་ལོ་ ༢༠༡༡ ཟླ་ ༣ ཚེས་ ༡༠ ལ། །

༸གོང་ས་མཆོག་གིས་གྲོས་ཚོགས་ལ་བསྩལ་བའི་གསུང་འཕྲིན།

2011-03-15T09:53:55Z

བོད་ཀྱི་དུས་བབ་ཀྱིས་འདོན་སྤེལ། ༢༠༡༡/༠༣/༡༥

འདི་ལོ་གསུམ་བཅུའི་དུས་དྲན་ཐེངས་ ༥༢ པའི་སྟེང་༸གོང་ས་མཆོག་གིས་གཞུང་གི་འཛིན་སྐྱོང་གི་ཐུགས་འགན་ཡོང་རྫོགས་མི་མང་གི་འོས་འདེམས་བྱས་པའི་མགོ་ཁྲིད་རྣམས་ལ་རྩིས་སྤྲོད་བྱ་རྒྱུ་ཐག་གཅོད་ཟིན་པ་དང་། ཐེངས་འདིའི་བོད་མི་མང་སྤྱི་འཐུས་གྲོས་ཚོགས་ཚོགས་དུས་བཅུ་གཅིག་པའི་ཐོག་འཕྲིན་ཡིག་གི་ལམ་ནས་བཅའ་ཁྲིམས་ཀྱི་གཙོས་ཁྲིམས་སྒྲིག་ཁག་ལ་གཞི་རྩའི་བསྐྱར་བཅོས་བྱ་དགོས་རྣམས་བྱེད་དགོས་པའི་ལམ་སྟོན་གནང་འཆར་ཡོད་ཅེས་གསུངས་བ་ལྟར། ཐེངས་འདིའི་གྲོས་ཚོགས་སྟེང་གསུང་འཕྲིན་བསྩལ་ཡོད།

༸གོང་ས་མཆོག་གི་གསུང་འཕྲིན་ནང་བཀོད་དོན། སྐབས་བཅུ་བཞི་པའི་བོད་མི་མང་སྤྱི་འཐུས་ཐུན་མོང་ལ། ཆེད་དོན། ཀུན་གྱིས་ཤེས་གསལ་ལྟར་ཡོངས་གྲགས་སུ་ཕྱི་ལོའི་གོང་གི་བརྒྱ་ཕྲག་གཉིས་པའི་ནང་བོད་རྒྱལ་ཐོག་མ་གཉའ་ཁྲི་བཙན་པོ་ནས་དབུ་ཚུགས་ཏེ་ཕྱི་ལོ་བརྒྱ་ཕྲག་དགུ་པའི་ནང་མངའ་བདག་ཁྲི་རལ་པ་ཅན་གྱི་བར་ལོ་གྲངས་ཆིག་སྟོང་བརྒལ་བའི་རིང་བོད་རྒྱལ་གདུང་རབས་ཞེ་གཉིས་ཀྱིས་རིམ་པས་ཆོལ་གསུམ་བོད་ལྗོངས་ཡོངས་ལ་མངའ་དབང་བསྒྱུར་ཏེ་པུར་རྒྱལ་བོད་ཅེས་བྱ་བ་ཤར་གླིང་དབུས་མའི་ནང་དཔུང་སྟོབས་དང་མངའ་ཐང་ཆེ་གྲས་སུ་གྱུར་ཏེ་རྒྱ་ཧོར་བོད་གསུམ་ཞེས་འདྲ་མཚུངས་སྟོབས་ཆེན་རྒྱལ་ཁབ་ཀྱི་གྲས་སུ་ཚུད་ཅིང༌། བོད་ཀྱི་སྐད་ཡིག་དང་བརྡ་སྤྲོད་རང་བཙན་པ་འབུར་དོད་བྱུང་བ་ནས་བཟུང་ཆོས་དང༌། རིག་གནས། སྤྱི་ཚོགས་ཀྱི་དཔལ་ཡོན་གང་ས་ནས་འཕགས་ཡུལ་གཉིས་པ་ལྟ་བུར་གྱུར། ཕྱི་ལོ་བརྒྱ་ཕྲག་དགུ་པའི་ནང་བོད་སིལ་བུར་ཐོར་བ་ནས་ཆིག་བསྒྲིལ་གྱི་ནུས་པ་ཉམས་ཏེ་ལུང་ཚན་སོ་སོའི་སྒེར་བཙན་ཙམ་ལས་བོད་སྤྱི་ལ་དབང་བའི་ཆབ་སྲིད་ཚགས་ཚུད་མ་བྱུང་བའི་ཐོག ཕྱི་ལོ་བརྒྱ་ཕྲག་བཅུ་གསུམ་པའི་འགོ་འཛུགས་ནས་ཇིང་གེ་སི་ཁཱན་གྱི་ཧོར་དམག་འོག་རྒྱ་ནག་ཙམ་མ་ཟད་བོད་ཁམས་ཡོངས་རྫོགས་ཀྱང་ཚུད། ཕྱི་ལོ་ ༡༢༦༠ ནང་འགྲོ་མགོན་ཆོས་རྒྱལ་འཕགས་པས་ཆོལ་གསུམ་ཡོངས་ལ་ཁྱབ་པའི་སྲིད་དབང་སླར་གསོ་མཛད་ཀྱང༌། རིང་པོར་མ་ཐོགས་པར་མཐའ་མཚམས་ཇི་བཞིན་སྐྱོང་མ་ཐུབ་ཁར། ལོ་ ༣༨༠ སྐོར་གྱི་ནང་ཕག་གྲུ་དང༌། རིན་སྤུངས། གཙང་པ་བཅས་བོད་ཀྱི་སྲིད་སྐྱོང་ལ་འགྱུར་བ་ཡང་ཡང་བྱུང་སྟེ་སོ་སོའི་རྒྱལ་སའི་ཉེ་འདབས་ས་ཁུལ་ཙམ་ལས་བོད་ལྗོངས་ཡོངས་ལ་ཁྲིམས་དང་དབང་ལུང་གིས་མ་ཁྱབ་ཅིང༌། ནང་ཁུལ་བདེ་གཟར་མང་བས་བོད་སྤྱིའི་ཆབ་སྲིད་ཀྱི་ནུས་པ་ཧ་ཅང་ཉམས་དམས་སུ་གྱུར།

ཕྱི་ལོ་ ༡༦༤༢ ལོར་ྋགོང་ས་ལྔ་པ་ཆེན་པོའི་བོད་གཞུང་དགའ་ལྡན་ཕོ་བྲང་དབུ་བརྙེས་པ་ནས་བཟུང་ྋརྒྱལ་བ་སྐུ་ཕྲེང་ན་རིམ་གྱིས་བོད་ཀྱི་ཆོས་སྲིད་གཉིས་ཀའི་དབུ་ཁྲིད་གནང་སྲོལ་ཚུགས་ཤིང༌། བོད་ཁྲི་སྐོར་བཅུ་གསུམ་ཀྱི་ཆབ་སྲིད་གང་ཙམ་སྲ་བརྟན་དང༌། རིས་མེད་རྒྱལ་བསྟན་དར་རྒྱས། བོད་འབངས་རྣམས་རང་དབང་བདེ་སྐྱིད་ཀྱི་འཚོ་བར་རོལ་ཐུབ་པ་བྱུང་ཞིང༌། ྋརྒྱལ་བ་སྐུ་ཕྲེང་ན་རིམ་གྱིས་དགུང་ན་སོན་མཚམས་ཆབ་སྲིད་ཀྱི་མཛད་ཁུར་རིམ་བཞེས་མཛད་ལམ་ཆགས། ཕྱི་ལོ་བརྒྱ་ཕྲག་བཅུ་དགུ་པའི་མཇུག་དང་ཉི་ཤུ་པའི་འགོ་ཙམ་ནས་སྲིད་ཕྱོགས་ཀྱི་ལས་དོན་སྤྱི་དང༌། ཁྱད་པར་རྒྱལ་སྤྱིའི་ནང་ཕྱི་འབྲེལ་ཇི་བཞིན་མ་བྱུང་ཁར། ྋརྒྱལ་མཆོག་སྐུ་ཕྲེང་བཅུ་གསུམ་པས་ཆབ་སྲིད་ཀྱི་མངའ་དབང་བཞེས་པ་ནས་རིང་པོར་མ་སོང་བར་འགལ་རྐྱེན་དབང་གིས་སོག་ཡུལ་དང༌། རྒྱ་ནག རྒྱ་གར་བཅས་སུ་ཕེབས་དགོས་བྱུང་སྟེ་སླར་རྒྱལ་ཁབ་ཏུ་ྋཞབས་སོར་འཁོད་བསྟུན་བོད་ཀྱི་མངའ་དབང་གི་གནས་བབ་བསྐྱར་ནན་གསལ་བསྒྲགས་དང་འབྲེལ་བར་སྐབས་རྒྱལ་སྤྱིའི་གནས་ཚུལ་གཟིགས་རྟོག་ཇི་བྱུང་བཞིན་བོད་འབངས་བདེ་ཐབས་དང༌། ཆབ་སྲིད་ཕྲ་ཚུགས་ཐབས་སུ་དེང་རབས་ཀྱི་སློབ་གསོ་དང༌། ལམ་ལུགས་ལེགས་བཅོས་སོགས་ལ་ཐུགས་བརྩོན་གནང་སྟེ་རླབས་ཆེན་གྱི་གྲུབ་འབྲས་བྱུང་ནའང༌། ཐུགས་བཞེད་ཡོངས་རྫོགས་ཇི་བཞིན་མ་འགྲུབ་པའི་གནས་ཚུལ་ཆུ་སྤྲེལ་ཞལ་གདམས་ལས་དཔོག་ནུས། ཕྱོགས་མཚུངས་དགའ་ལྡན་ཕོ་བྲང་གི་རྒྱལ་ཚབ་དང་སྲི་ཞུ་བ་ན་རིམ་གྱིས་ནོར་འཁྲུལ་དང་འཐུས་ཤོར་སྣ་ཚོགས་བྱུང་ཡོད་མོད། མདོ་དོན་བོད་སྤྱིའི་ཆབ་སྲིད་ཀྱི་མངའ་དབང་མི་དམན་ཙམ་ལོ་བཞི་བརྒྱར་ཉེ་བའི་རིང་སྲ་བརྟན་འཛིན་སྐྱོང་ཐུབ་པ་བྱུང་ཡོད།

ངོས་རང་ྋརྒྱལ་བའི་ཡང་སྲིད་དུ་ངོས་འཛིན་ཁྲི་འདོན་བྱུང་རྗེས་ཆུང་ངུའི་དུས་ནས་འབྱུང་འགྱུར་བོད་ཀྱི་ཆབ་སྲིད་ཀྱི་ལམ་སྲོལ་དེང་རབས་ཅན་དུ་བསྒྱུར་གལ་ཆེ་བའི་བསམ་ཚུལ་ཡོད་མུས་སུ། རང་ལོ་བཅུ་དྲུག་ལས་མ་སོན་ཞིང༌། རྒྱལ་སྤྱིའི་ལམ་སྲོལ་ལྟ་ཅི། བོད་རང་གི་སྲོལ་རྒྱུན་ལམ་ལུགས་ཁག་ཀྱང་ཆ་ཚང་རྒྱུས་མྱོང་མེད་སྐབས་ནས་ཆབ་སྲིད་ཀྱི་འགན་ཁུར་སྔ་བསྣུར་གྱིས་མ་ལེན་མཐུ་མེད་བྱུང་སྐབས། གནས་བབ་ཛ་དྲག་དང་རྐྱེན་ངན་རྣམ་མང་རུ་འཛིངས་སུ་ཡོད་ནའང༌། བོད་ཀྱི་ཆབ་སྲིད་ལམ་སྲོལ་སྔར་ལམ་དེབ་གསལ་ལྟ་བུ་མིན་པར་གནས་དུས་དང་འཚམས་པའི་བསྒྱུར་བཅོས་བྱེད་རྒྱུའི་འདུན་པ་ཆེ་བསྐྱེད་ཡོད་ཁོངས་ནས། བསྒྱུར་བཅོས་ཚོགས་པ་གསར་འཛུགས་སོགས་ཐབས་ཤེས་རྣམ་གྲངས་མི་ཉུང་བ་ཞིག་བྱས་རུང༌། ཕྱི་ནང་གི་འགལ་རྐྱེན་སྣ་ཚོགས་དབང་གིས་འདོད་བློ་ཁེངས་པའི་ལེགས་བཅོས་བྱེད་མ་ཐུབ། ཕྱི་ལོ་ ༡༩༥༩ ལོའི་ཕྱི་ཟླ་ ༤ པའི་ནང་རྒྱ་གར་དུ་བཙན་བྱོལ་ལ་འབྱོར་མ་ཐག་མང་གཙོའི་ལམ་སྲོལ་ལག་བསྟར་བྱ་རྒྱུ་གལ་གནད་ཆེ་ཤོས་གྲས་སུ་བརྩིས་ཏེ་བཀའ་བློན་ལས་ཁུངས་ཁག་ཆ་བགོས་གསར་འཛུགས་དང༌། མང་ཚོགས་ཀྱིས་འོས་འདེམས་བྱས་པའི་སྤྱི་འཐུས་ལྷན་ཚོགས་སོགས་རིམ་འཛུགས་བྱ་རྒྱུའི་གྲྭ་སྒྲིག་བྱེད་འགོ་ཚུགས།

རྒྱལ་ཁབ་སུ་འདྲ་ཞིག་ཡིན་རུང་ཡུལ་མི་ཡོངས་ནས་ཕྱར་གྲུ་མཉམ་འདེགས་ཀྱིས་འགན་ཁུར་བའི་ཐོག་ནས་གནས་དུས་དང༌། མང་ཚོགས་ཀྱི་མངོན་འདོད་ལ་བསྟུན་ནས་ཆབ་སྲིད་འཛིན་སྐྱོང་མ་བྱས་པར། རྒྱུད་འཛིན་ལྟ་བུའི་འགོ་ཁྲིད་མི་གཅིག་ལ་བློས་འགེལ་གྱིས་མང་ཚོགས་འགན་ཁུར་མེད་པར་བསྡད་ན་རྒྱལ་ཁབ་དང་མི་རིགས་སྲ་བརྟན་གནས་མི་ཐུབ་པ་དང༌། ཡུལ་ལུང་གི་ཡར་རྒྱས་ཚུལ་བཞིན་ཡོང་མི་ཐུབ་པ་དངོས་མཐོང་ཁར། མི་གཅིག་དབང་འཛིན་གྱི་ལམ་སྲོལ་ནི་དུས་ཚོད་ཡོལ་ཟིན་པ་དང༌། དེང་རབས་ཆབ་སྲིད་ཀྱི་ལམ་སྲོལ་ཐམས་ཅད་ཀྱི་ནང་ནས་གུ་ཡངས་མང་གཙོའི་རིང་ལུགས་བཟང་ཤོས་ཡིན་པ་བཅས་ལ་བརྟེན་གཞན་གྱི་ལད་མོ་དང་མཛེས་ཆོས་ཙམ་མ་ཡིན་པར་བོད་མི་ས་ཡ་དྲུག་གི་འཕྲལ་ཕུགས་ཀྱི་བདེ་དོན་རང་ལ་དམིགས་ཏེ་མང་གཙོའི་ལམ་སྲོལ་ལ་ཡིད་ཆེས་ཀྱིས་བསྒྱུར་བཅོས་ལག་ལེན་སྒོ་དུ་མ་ནས་བརྩམས་ཏེ། ཕྱི་ལོ་ ༡༩༦༠ ལོར་བོད་མི་མང་སྤྱི་འཐུས་ལྷན་ཚོགས་གསར་འཛུགས་དང༌། དེ་རྗེས་མ་འོངས་བོད་ཀྱི་རྩ་ཁྲིམས་འཆར་ཟིན་གསལ་བསྒྲགས། ཕྱི་ལོ་ ༡༩༩༠ ལོར་བཅའ་ཁྲིམས་ཟིན་བྲིས་ཚོགས་ཆུང་ཆེད་བཙུགས་དང༌། སྤྱི་འཐུས་གྲངས་སྤར་གྱིས་ཕྱི་ལོ་ ༡༩༩༡ ལོར་བཙན་བྱོལ་དུ་གནས་རིང་ལག་བསྟར་ཐུབ་པའི་བཙན་བྱོལ་བོད་མིའི་བཅའ་ཁྲིམས་སྐབས་བཅུ་གཅིག་པའི་སྤྱི་འཐུས་ལྷན་ཚོགས་ནས་གཏན་འབེབས་བྱས་ཏེ་ཁྲིམས་ཀྱི་དབང་བསྒྱུར་མིང་དོན་མཚུངས་པ་དང༌། སྤྱི་ལྷན་དབང་ལུང་ལྡན་པའི་ཁྲིམས་བཟོ་ལྷན་ཚོགས་སུ་བསྒྱུར་ཐུབ་པ་སོགས་བཙན་བྱོལ་བའི་གནས་བབ་ལ་གཞིགས་པའི་གྲུབ་འབྲས་མི་དམན་པ་ཐོན་ཡོད། ཕྱི་ལོ་ ༢༠༠༡ ལོར་བོད་མིའི་ཆབ་སྲིད་ཀྱི་འགོ་ཁྲིད་བཀའ་བློན་ཁྲི་པ་མང་ཚོགས་ནས་ཐད་ཀར་འོས་འདེམས་དགོས་པའི་ལམ་སྟོན་ལག་བསྟར་བྱས་པ་ནས་བཟུང་ངོས་རང་རྒྱུན་ལྡན་འཛིན་སྐྱོང་གི་ལས་དོན་ཐོག་ཐེ་བྱུས་མི་དགོས་པར་ཕྱེད་རྒས་ཡོལ་ལྟ་བུས་འཇིག་རྟེན་སྤྱི་ཡོངས་ལ་སྨན་པའི་བྱེད་སྒོ་གཞན་གྱི་ཐོག་དུས་ཚོད་ཇེ་མང་གཏོང་རྒྱུའི་གོ་སྐབས་བླངས་པ་ཡིན། བཙན་བྱོལ་བོད་མིའི་བཅའ་ཁྲིམས་ཟིན་བྲིས་སུ་བོད་མིའི་ཆབ་སྲིད་ཀྱི་རང་བཞིན་ཆོས་ལུགས་རིས་མེད་དང༌། ཡུལ་མིའི་རྒྱལ་ཁབ་ཀྱི་བརྗོད་ཚིག་བཀོད་པ་དེ་ཡང་མཐར་ཐུག་ཆབ་སྲིད་ཀྱི་དབུ་ཁྲིད་མཚན་གནས་རྗེས་འབྲེལ་མ་ཡིན་པར་འོས་བསྡུའི་ལམ་ནས་ཡོང་རྒྱུའི་ཆ་རྐྱེན་དུ་ཕུགས་དམིགས་བཟུང་བ་ཞིག་ཡིན། མདོ་དོན་མང་གཙོའི་ལམ་སྲོལ་གྱི་ངོ་བོའམ་སྙིང་དོན་མཐར་ཐུག་ཆབ་སྲིད་དང་འཛིན་སྐྱོང་གི་ལས་དོན་གང་ཡང་མི་བྱེ་བྲག་པ་གཅིག་ལ་བརྟེན་མི་དགོས་པར། མི་མང་གི་ཆེད་དུ་མི་མང་གིས་བདམས་པའི་མི་མང་གི་འགོ་ཁྲིད་རིམ་པས་མི་མང་གི་འགན་ཁུར་ཆ་ཚང་ཐུབ་པ་བྱེད་རྒྱུ་དེ་ཡིན་སྟབས། ད་ཆ་རང་རེའི་མང་གཙོའི་འཕེལ་རིམ་ཡོངས་སུ་རྫོགས་པའི་ཆེད་དུ་ྋརྒྱལ་བ་རིན་པོ་ཆེས་བོད་ཀྱི་ཆབ་སྲིད་ཀྱི་འགན་ཁུར་མ་དགོས་པར་མི་མང་གིས་འོས་འདེམས་བྱས་པའི་འགོ་ཁྲིད་སོ་སོས་ཆབ་སྲིད་ཀྱི་དབང་ལུང་ཡོངས་རྫོགས་འགན་ཁུར་བྱེད་དགོས་པའི་དུས་ལ་བབས་ཡོད།

དེ་འདྲའི་བསམ་ཚུལ་དེ་ཉེ་དུས་གསར་བྱུང་ཞིག་མིན་པར་མང་གཙོའི་ལམ་སྲོལ་དུ་བསྐྱོད་རྒྱུའི་ལས་རིམ་འགོ་འཛུགས་བྱེད་སྐབས་ནས་ཡོད་ཀྱང་ཕྱི་ནང་གི་གནས་ཚུལ་སྤྱི་དང༌། ཁྱད་པར་མང་ཚོགས་དང་འོས་འདེམས་བྱས་པའི་འཐུས་མི་རྣམས་ཀྱི་ཤེས་འཇོན་དང༌། བསམ་སྤྱོད་མྱོང་གོམས་བཅས་ཚད་ལོང་ཡོང་རེས་ངང་སྒུག་བྱས། མི་ལོ་བཞི་བརྒྱར་ཉེ་བའི་རིང་ྋརྒྱལ་བ་སྐུ་ཕྲེང་ན་རིམ་གྱིས་དངོས་བརྒྱུད་ཅི་རིགས་ནས་བོད་ཀྱི་ཆབ་སྲིད་ཀྱི་དབུ་ཁྲིད་པའི་སྲོལ་རྒྱུན་ལ་གོམས་ཤུགས་ཆེ་བའི་བོད་མི་སྤྱི་དང༌། ཁྱད་པར་གཞིས་བཞུགས་བོད་མི་རྣམས་ཀྱིས་ྋརྒྱལ་བ་རིན་པོ་ཆེ་མེད་པའི་བོད་མིའི་ཆབ་སྲིད་ཀྱི་སྒྲིག་འཛུགས་ཤིག་བསམ་བློར་འཆར་དཀའ་བའི་སྔོན་གོམས་བག་ཆགས་ཀྱི་དབང་གིས་གནས་ཚུལ་འདི་རིགས་མང་ཚོགས་ནས་འཕྲལ་མར་ངོས་ལེན་ཡོང་ཐབས་དཀའ་བ་ཤེས་རྟོགས་ཡོད་པ་ལྟར་འདས་པའི་ལོ་ ༥༠ ཙམ་གྱི་རིང་གཞིས་བྱེས་མང་ཚོགས་ལ་ཆབ་སྲིད་ཀྱི་གོ་རྟོགས་དང༌། འགན་ཁུར་གྱི་སེམས་སྟོབས་གོང་མཐོར་སྤེལ་ཐབས་སྒོ་དུ་མ་ནས་བྱས་དང་བྱེད་བཞིན་པ་དཔེར་ན། ཕྱི་ལོ་ ༡༩༦༩ ལོར་གསུམ་དུས་གསུང་འཕྲིན་དུ་ "བོད་འཛིན་སྐྱོང་བྱེད་པའི་གོ་སྐབས་བོད་མི་ཚོར་བྱུང་བའི་ཉིན་བོད་ཀྱི་སྲིད་གཞུང་ཇི་འདྲ་ཞིག་འཛུགས་མིན་ནི་བོད་མི་ཚོས་ཐག་གཅོད་བྱ་རྒྱུ་མ་ཟད། ཏཱ་ལའི་བླ་མས་འཛིན་སྐྱོང་བྱེད་པའི་གཞུང་གི་སྲོལ་ལུགས་འདི་ཡང་ཡོང་གི་ཡོད་མེད་ངེས་པ་མེད། མ་འོངས་པའི་བོད་ཀྱི་ཐག་གཅོད་ནི་བོད་མི་མང་རང་གིས་བྱེད་ངེས་ཡིན་ཞིང༌། ལྷག་པར་དེང་དུས་ཤེས་ཡོན་སྦྱང་བརྩོན་བྱས་པའི་གཞོན་སྐྱེས་ཡར་ཐོན་ཅན་ཚོའི་བསམ་ཚུལ་གྱི་ནུས་ཤུགས་འདོན་ངེས་ཡིན།" ཞེས་དང༌། དེ་བཞིན་ ༡༩༨༨ ལོའི་གསུམ་དུས་གསུང་འཕྲིན་ནང་ "ངས་དེ་སྔོན་ནས་ཐེངས་མང་ཤོད་མྱོང་བ་ལྟར། ཏཱ་ལའི་བླ་མའི་ལམ་སྲོལ་འདི་ཡང་མུ་མཐུད་གནས་དགོས་མིན་ནི་བོད་མི་མང་གིས་ཐག་གཅོད་བྱེད་ངེས་ཡིན།" ཞེས་དང༌། དེ་བཞིན་ཕྱི་ལོ་ཆིག་སྟོང་དགུ་བརྒྱ་བརྒྱད་ཅུ་གྱ་གྲངས་ནས་བཟུང་བཀའ་ཤག་དང༌། སྤྱི་འཐུས། ལས་བསྡོམས་ཚོགས་འདུ་སོགས་སུ་ད་ཕྱིན་རྒྱལ་བ་རིན་པོ་ཆེ་མེད་པ་ལྟ་བུར་བརྩིས་ཏེ་གཞུང་དང་མང་ཚོགས་ཀྱི་ལས་འགན་ཆ་ཚང་འཁུར་དགོས་ཞེས་ཡང་ཡང་བཤད་ཡོད། དེ་བཞིན་སྤྱི་འཐུས་སྐབས་ ༡༣ པའི་ཚོགས་གཙོ་དང༌། སྐབས་དེའི་ཁྲིམས་ཞིབ་པ་ཆེ་བ་བཅས་ལ་སྤྱི་འཐུས་ལྷན་ཚོགས་ཀྱིས་གཏན་ལ་ཕབ་པའི་ཁྲིམས་འཆར་ཁག་གི་ཐོག་ངོས་ནས་མིང་རྟགས་འགོད་རྒྱུས་མཚོན་ཆབ་སྲིད་དང་འཛིན་སྐྱོང་གི་དབུ་ཁྲིད་ཀྱི་མཚན་གནས་རྗེས་འབྲེལ་གྱི་བྱེད་སྒོ་དེ་རིགས་མེད་པ་བཟོ་འགབ་བརྗོད་ཡོད་ཀྱང༌། སྐབས་དེར་རྒྱུ་མཚན་རྣམ་མང་བགྲངས་ཏེ་གནས་སྐབས་ངང་འཐེན་དགོས་པའི་ཨུ་ནན་བྱུང་བ་ལྟར་དེ་མུས་སུ་ལུས། དེ་བཞིན་སྔ་ལོ་ཕྱི་ཟླ་ ༨ ཚེས་ ༣༡ ཉིན་བོད་གཞུང་མང་རྒྱལ་ཡོངས་ཚོགས་ཆེན་ཐེངས་དང་པོའི་སྐབས་སུའང་ཞིབ་ཕྲ་བརྗོད་རྒྱུ་བྱུང་བ་ལྟར། ད་ཆ་གལ་ཆེའི་གནད་དོན་འདི་ཉིན་འགྱངས་ཞག་འཕུལ་དུ་མ་བཞག་པར་ད་རེས་གྲོས་ཚོགས་ཀྱི་ཚོགས་དུས་འདིའི་ཐོག་བཅའ་ཁྲིམས་གཙོ་བོར་གྱུར་པའི་ཁྲིམས་སྒྲིག་ཁག་ལ་བསྐྱར་བཅོས་དགོས་ངེས་རྣམས་བསྐྱར་བཅོས་ཀྱིས་ངོས་ནས་ཏཱ་ལའི་བླ་མའི་མཚན་གནས་རྗེས་འབྲེལ་གྱི་ཆབ་སྲིད་དང་འཛིན་སྐྱོང་གི་བྱེད་སྒོ་གང་ཡང་མ་དགོས་པ་ཞིག་ངེས་པར་བྱེད་དགོས།

སྐབས་འདིར་ནན་བརྗོད་བྱ་རྒྱུ་ཞིག་ལ། བར་སྐབས་དེར་བཙན་བྱོལ་བོད་མིའི་སྡོད་སྒར་ཁག་གིས་མཚོན་བོད་ཕྱི་ནང་གི་མང་ཚོགས་དང༌། མི་སྒེར་མང་པོས་ལྷག་བསམ་ཟོལ་མེད་ཀྱིས་ངོས་ལ་སྔར་བཞིན་ཆབ་སྲིད་ཀྱི་འགན་ཁུར་མུ་མཐུད་བྱ་དགོས་རེ་བསྐུལ་བྱུང་ཡང༌། ངོས་ཀྱི་སྲིད་དབང་རྩིས་སྤྲོད་བྱ་རྒྱུའི་བསམ་ཚུལ་འདི་འགན་ཁུར་བྱེད་འདོད་མེད་པའམ། སེམས་ཤུགས་ཆག་པ། བོད་མིའི་བདེན་དོན་འཐབ་རྩོད་བློས་བཏང་བ་ཞིག་གཏན་ནས་མ་ཡིན་པར་བོད་མིའི་འཕྲལ་ཕུགས་ཀྱི་ཁེ་ཕན་ཁོ་ནའི་ཆེད་དུ་དམིགས་པ་ཞིག་ཡིན། བོད་དོན་བདེན་མཐའ་མ་གསལ་བར་བཙན་བྱོལ་བོད་མིའི་སྒྲིག་འཛུགས་འདི་རྒྱུན་གནས་ཐུབ་པ་དང༌། བོད་མིའི་དྲང་བདེན་གྱི་འཐབ་རྩོད་རྒྱུན་སྐྱོང་ཐུབ་པ་ཞིག་དགོས་གལ་ཤིན་ཏུ་ཆེ་ཞིང༌། ཅི་སྟེ་ད་དུང་ལོ་བཅུ་ཕྲག་འགའ་ཤས་མུ་མཐུད་གནས་དགོས་པ་བྱུང་ན་ངོས་ནས་འགོ་ཁྲིད་བྱེད་མ་ཐུབ་པའི་དུས་ཤིག་ངེས་པར་ཡོང་རྒྱུ་ཡིན་པ་ནི་ཚང་མས་ཤེས་གསལ་དང་། ད་ལྟ་ངོས་་རང་བདེ་ཐང་ཡོད་སྐབས་ནས་བཙན་བྱོལ་བོད་མིའི་སྒྲིག་འཛུགས་ཀྱི་འགན་ཁུར་ཆ་ཚང་ྋརྒྱལ་བ་རིན་པོ་ཆེར་བརྟེན་མི་དགོས་པར་རང་ཚུགས་ཐུབ་པ་ཡོང་རྒྱུའི་གོམས་གཤིས་འཇགས་ཐབས་སུ། ལམ་སྲོལ་འདི་ད་ལྟ་ནས་ལག་བསྟར་བྱེད་རྒྱུ་བྱུང་ན་དཀའ་ངལ་འཕྲད་ཚེ་སེལ་ཐབས་སུ་ངོས་ཀྱིས་མཐུན་འགྱུར་བྱེད་ཐུབ། དེ་མིན་འདི་མུར་ལུས་ཏེ་ནམ་ཞིག་གློ་བུར་ངོས་ཀྱི་འགོ་ཁྲིད་མེད་པའི་དུས་སྐབས་ཤར་ཚེ་ཅི་བྱ་གཏོལ་མེད་ཀྱི་གནས་ཚུལ་ཞིག་ཡོང་སྲིད་པས་དེ་འདྲ་མི་ཡོང་ཆེད་ད་ལྟ་ནས་ངེས་པར་ལག་ལེན་བྱེད་དགོས་པ་དེ་བོད་མི་ཡོངས་ཀྱི་གལ་ཆེའི་ལས་འགན་ཞིག་ཏུ་གྱུར་ཡོད། ངོས་རང་བོད་ཀྱི་ཡུལ་མི་ཞིག་ཡིན་པ་དང༌། བོད་མི་རིགས་དང་རྒྱལ་དབང་སྐུ་ཕྲེང་དབར་ལས་སྨོན་གྱི་འབྲེལ་བའི་དབང་གིས་རྒྱ་ཆེའི་མང་ཚོགས་ཚང་མའི་ཡིད་ཆེས་བློ་གཏད་ཡོད་པ་དེ་སྲིད་དུ་ངོས་ནས་བསྟན་སྲིད་སྤྱི་དོན་ཡལ་བར་འདོར་མི་སྲིད་ཅིང༌། བོད་ཀྱི་རྩ་དོན་སྒྲུབ་ཐབས་དང༌། ཆོས་ཕྱོགས་ཀྱི་བྱེད་སྒོ་མཐའ་དག་རྒྱུན་འཁྱོངས་ངེས་པར་བྱེད་རྒྱུར་ཚང་མས་བློ་གཡེང་མི་དགོས།

བཙན་བྱོལ་བོད་མིའི་བཅའ་ཁྲིམས་དོན་ཚན་ ༣༡ པའི་ནང་སྡེ་སྲིད་ལྷན་ཚོགས་ཀྱི་ཆ་རྐྱེན་ཞིག་ཡོད་ཀྱང་དེ་ནི་སྔོན་སྲོལ་རྒྱུན་སྐྱོང་ལྟ་བུ་དང་བར་བརྒལ་གྱི་ཆ་རྐྱེན་ཙམ་ལས་ྋརྒྱལ་བ་རིན་པོ་ཆེས་བོད་ཀྱི་ཆབ་སྲིད་ཀྱི་འགོ་ཁྲིད་བྱེད་མི་དགོས་པའི་ཆ་རྐྱེན་ཞིག་ཏུ་གྱུར་མེད། དཻར་བརྟེན་ད་ལམ་བཅའ་ཁྲིམས་བསྐྱར་བཅོས་སྐབས་བཅའ་ཁྲིམས་ཀྱི་སྒྲོམ་གཞི་ལ་འགྱུར་བ་བཏང་ནས་ཆབ་སྲིད་དང་འཛིན་སྐྱོང་གཉིས་ཀའི་འགོ་ཁྲིད་མང་ཚོགས་ཀྱིས་འོས་འདེམས་བྱས་པའི་མི་སྣས་དུས་ཡུན་ངེས་ཅན་དུ་བྱ་རྒྱུའི་ཆ་རྐྱེན་བསྐྲུན་ཏེ་བཅའ་ཁྲིམས་ཡུལ་མིའི་རྒྱལ་ཁབ་ཀྱི་སྒྲོམ་གཞི་དང་མཐུན་པ་ཞིག་ངེས་པར་བཟོ་དགོས་ཤིང༌། དེའི་འོག་རྗེས་འབྲེལ་དོན་ཚན་གཞན་དག་དང༌། ཁྲིམས་སྒྲིག་གཞན་ཁག་བསྐྱར་བཅོས་བྱ་རྒྱུའི་ཆེད་ཚོགས་ཆུང་ཟུར་འཛུགས་སམ་ལས་རིམ་ཇི་དགོས་ཚོགས་དུས་འདི་རང་དུ་གཏན་འབེབས་ལག་བསྟར་ངེས་པར་དུ་ཐུབ་པ་དགོས་རྒྱུ། དེ་ལྟར་བྱུང་མཚམས་མ་འོངས་བོད་ཀྱི་རྩ་ཁྲིམས་འཆར་ཟིན་དང་ཆབ་སྲིད་ལམ་སྟོན་སོགས་ངོས་ཀྱིས་སྤེལ་བའི་སྲིད་དོན་གྱི་ཡིག་ཆ་འགའ་ཤས་རང་བཞིན་ནུས་མེད་དུ་འགྲོ་རྒྱུ་དང༌། དགའ་ལྡན་ཕོ་བྲང་ཞེས་པའི་མིང་བྱང་ཡང་སྐབས་བསྟུན་འགྱུར་བ་གཏོང་དགོས་དེ་དོན་ཡིད་འཇགས་འཚལ། གྲོས་ཚོགས་ཀྱི་བྱེད་སྒོ་ཁག་ལམ་ལྷོང་ཡོང་བའི་སྨོན་འདུན་བཅས་ཏཱ་ལའི་བླ་མ་སྐྱེ་ཕྲེང་བཅུ་བཞི་པ་ཆོས་སྨྲ་བ་བསྟན་འཛིན་རྒྱ་མཚོས་ཕྱི་ལོ་ ༢༠༡༡ ཟླ་ ༣ ཚེས་ ༡༡ དགེ་བར་བྲིས།། ཞེས་བསྟན་འདུག

བཀའ་སྤྱི་གཉིས་ཀྱི་དངོས་གཞིའི་འོས་མི་གསལ་བསྒྲགས།

2011-02-01T18:16:29Z

བོད་ཀྱི་དུས་བབ་ཀྱིས་འདོན་སྤེལ། ༢༠༡༡/༠༡/༡༩

དབུས་འོས་བསྡུ་ལྷན་ཁང་གིས་སྐབས་བཅུ་བཞི་བའི་བཀའ་ཁྲིའི་དངོས་གཞིའི་འོས་མི་གསུམ་དང་། སྐབས་བཅོ་ལྔ་བའི་བོད་མི་མང་སྤྱི་འཐུས་ཀྱི་དངོས་གཞིའི་འོས་མིར་ཆོལ་ཁ་རེར་ཉི་ཤུ་རེ་དང་། ཆོས་བརྒྱུད་ཁག་དང་བྱང་ཨ་རི ཡུ་རོབ་བཅས་ཀྱི་དངོས་གཞིའི་འོས་མི་བཞི་རེ་བཅས་ཀྱི་མིང་གཞུང་གསལ་བསྒྲགས་གནང་ཡོད།

དེ་རིང་ཕྱི་ཚེས་ ༡༩ ཉིན་གྱི་ཞོགས་པར་བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་དབུས་འོས་བསྡུ་ལྷན་ཁང་གིས་སྐབས་གསུམ་པའི་བཀའ་བློན་ཁྲི་པ་དང་སྐབས་བཅོ་ལྔ་བའི་བོད་མི་མང་སྤྱི་འཐུས་ཀྱི་དངོས་གཞིའི་འོས་མི་ཁག་གསལ་བསྒྲགས་བསྐྱངས་ཡོད། སྐབས་བཅུ་བཞི་བའི་བཀའ་བློན་ཁྲི་པའི་དངོས་གཞིའི་འོས་མི་ ༣ དང་། སྐབས་བཅོ་ལྔ་བའི་བོད་མི་མང་སྤྱི་འཐུས་ཀྱི་དངོས་གཞིའི་འོས་མིའི་ཁོངས་སུ་ཆོལ་ཁ་རེར་འོས་མི་ ༢༠ རེ་དང་། ཆོས་བརྒྱུད་རེར་འོས་མི་ ༤ རེ། དེ་བཞིན་བྱང་ཨ་རི་དང་ཡུ་རོབ་བཅས་སུའང་འོས་མི་ ༤ རེ་བཅས་བཀོད་འདུག

སྐབས་དེར་དབུས་འོས་བསྡུའི་ལས་འཕར་དགེ་བཤེས་རིག་འཛིན་ཆོས་གྲགས་ལགས་ཀྱིས། ཆོས་བརྒྱུད་ཁག་དང་བྱང་ཨ་རི། ཡུ་རོབ་བཅས་ཀྱི་འོས་མི་རྣམས་ཀྱི་མཚན་གཞུང་བསྒྲགས་པ་ལས་ས་སྐྱའི་འོས་མི་དག་ནི། ནོར་བུ་ཚེ་རིང་། ཆོས་གྲགས་རྒྱ་མཚོ། དགེ་བཤེས་ག་ཟེ་ཚེ་རིང་པོ། ཐུབ་བསྟན་རྒྱལ་མཚན་བཅས་དང་། དགེ་ལུགས་པའི་འོས་མི་དག་ནི། རོང་བོ་བློ་བཟང་སྙན་གྲགས། ཨ་ཀྲུག་ཚེ་བརྟན། དགེ་བཤེས་བློ་བཟང། འཁྲུངས་གསར་རིན་པོ་ཆེ་བསྟན་འཛིན་དཔལ་ལྡན། རྙིང་མའི་འོས་མི་དག་ནི། སློབ་དཔོན་བསོད་ནམས་བསྟན་འཕེལ། རྒྱ་རི་བུ་ཕྲུག སློབ་དཔོན་དྲི་མེད་རྒྱལ་མཚན། མཁན་པོ་ཆོས་དབྱིངས། བཀའ་བརྒྱུད་ཀྱི་འོས་མི་དག་ནི། བསྟན་པ་ཡར་འཕེལ། ཀ་རྨ་ཆོས་འཕེལ། ཁང་དཀར་དབང་ཕྱུག་རྡོ་རྗེ། བླ་མ་འཕྲིན་ལས། བོན་པོའི་འོས་མི་དག་ནི། དགེ་བཤེས་སྨོན་ལམ་མཐར་ཕྱིན། བ་ར་ཚེ་དབང་བཀྲིས། དགེ་བཤེས་རྣམ་དག་གཙུག་ཕུད། བློ་བཟང་རྒྱ་མཚོ་བཅས་ཡིན་ཞིང་། དེ་བཞིན་བྱང་ཨ་རིའི་འོས་མི་དག་ནི། བཀྲ་ཤིས་རྣམ་རྒྱལ། ནོར་བུ་ཚེ་རིང་། ཀུན་དགའ་འཕྲིན་ལས། བཀྲ་ཤིས་ཕུན་ཚོགས་བཅས་དང་། དང་བླངས་འོས་མི་གཅིག་ནི། བདེ་སྐྱིད་ཆོས་དབྱིངས་བཅས་རེད།

ཡུ་རོབ་ཁུལ་འོས་མི་དག་ནི། ཐུབ་བསྟན་དབང་ཆེན། དབང་པོ་བཀྲས་མཐོང་། ཆུང་བདག་ཀོ་རིན། བསམ་མདོ་བྱམས་པ་ཚེ་རིང་བཅས་དང་། དང་བླངས་འོས་མི་གཅིག་ནི་སྨོན་མཁན་བསོད་ནམས་ཕུན་ཚོགས་བཅས་རེད།

དེའི་རྗེས་དབུས་འོས་བསྡུ་ལས་འཕར་འགན་འཛིན་ལས་རོགས་གཡང་མཁོ་རྒྱལ་ལགས་ཀྱིས་ཆོལ་ཁ་གསུམ་གྱི་སྤྱི་འཐུས་དངོས་གཞིའི་འོས་མི་རྣམས་གསལ་བསྒྲགས་གནང་བ་ལས། དབུས་གཙང་གི་འོས་མི་དག་ནི། ཨཱ་ཅརྱ་ཡེ་ཤེས་ཕུན་ཚོགས། པདྨ་འབྱུང་གནས། སྒྲོལ་མ་ཚེ་རིང་། ཀརྨ་ཡེ་ཤེས། ཟླ་བ་ཚེ་རིང་། བུ་མོ་ཚེ་རིང་། ཟླ་བ་ཕུན་སྐྱིད། ཚེ་བརྟན་ནོར་བུ། འཇིགས་མེད་འབྱུང་གནས། ཨོ་རྒྱན་བསྟན་འཛིན། འཇམ་དབྱངས་རྡོ་རྗེ། ངག་དབང་ལྷ་མོ། སྒོ་དྲུག་སྐལ་བཟང་ཕུན་ཚོགས། དགེ་བཤེས་སྐལ་བཟང་དགྲ་འདུལ། ཤར་གླིང་བསྟན་འཛིན་ཟླ་སྒྲོན། ཚེ་རིང་སྒྲོལ་མ། འཆི་མེད་གཡུང་དྲུང་། བསོད་ནམས་བཟང་པོ། བྱ་ཉང་ཚེ་རིང་ལྷ་སྐྱབས། སྨན་རམས་པ་པདྨ་རྡོ་རྗེ་བཅས་དང་། དྭང་བླངས་འོས་གསུམ་ནི། ཕུན་རབ་ཆོས་བཟང་དང་ལུང་རིགས་བསོད་ནམས། དཀོན་མཆོག་ཚེ་རིང་བཅས་རེད།

མདོ་སྟོད་ཀྱི་འོས་མི་དག་ནི། འབའ་བ་སྐལ་བཟང་རྒྱལ་མཚན། འཇུ་ཆེན་དཀོན་མཆོག་ཆོས་སྒྲོན། གསེར་རྟ་ཚུལ་ཁྲིམས། ཚུལ་ཁྲིམས་བསྟན་འཛིན། དགེ་བཤེས་གཡུང་དྲུང་རྒྱལ་མཚན། དབུ་དཀར་ཚང་གཡུ་སྒྲོན། གངས་ལྷ་མོ། ཆོས་སྐྱོང་དབང་ཕྱུག བློ་བཟང་ཡེ་ཤེས། རྡོ་རྗེ་དབང་འདུས། འཇམ་དབྱངས་བཟོད་པ། སྒ་པ་ལྷ་མོ། ཆོས་འཕེལ་ཐུབ་བསྟན། པདྨ་བདེ་ལེགས། དབྱངས་ཅན་སྒྲོལ་དཀར། གྲའུ་ཚེ་བརྟན། ཟླ་བ་སྒྲོལ་མ། ཀརྨ་མཁས་གྲུབ། གོ་བོ་བློ་བཟང་ཕན་བདེ། ངག་དབང་བསྟན་པ་བཅས་དང་། དྭང་བླངས་འོས་མི་གཅིག་ནི། བཀྲིས་ཕུན་ཚོགས་བཅས་རེད།

མདོ་སྨད་ཀྱི་འོས་མི་དག་ནི། སྤེན་པ་ཚེ་རིང་། རྒྱལ་རོང་ཟླ་བ་ཚེ་རིང་། ཐུབ་བསྟན་ལུང་རིགས། འཕེལ་རྒྱས་སྒྲོལ་མ་མཚོ་མོ། བསོད་ནམས་རྒྱལ་མཚན། ཀིརྟི་སྒྲོལ་དཀར་ལྷ་མོ། སྒྲོལ་དཀར་སྐྱབས། ཚེ་རིང་གཡུ་སྒྲོན། ཡེ་ཤེས་སྒྲོལ་མ། སྨན་པ་མཁྱེན་རབ། རྨོག་རུ་བསྟན་པ། རྒྱ་རིགས་ཐར། ཀུན་ཐར་དོན་འགྲུབ། བློ་བཟང་དཔལ་ལྡན། ཀརྨ་དགེ་ལེགས། ཆབ་བྲག་ལྷ་མོ་སྐྱབས། ཀླུ་མཁར་བྱམས། བཀྲ་ཤིས་དོན་འགྲུབ། ཚངས་དབྱངས་རྒྱ་མཚོ། ཚེ་རིང་རྡོ་རྗེ་བཅས་རེད།

མཐའ་མར་དབུས་འོས་བསྡུའི་འགན་འཛིན་འཇམ་དཔལ་ཆོས་བཟང་ལགས་ཀྱིས་ཐེངས་འདིའི་བཀའ་ཁྲིའི་དངོས་གཞིའི་འོས་མི་གསུམ་སྟེ། བློ་བཟང་སེང་གེ་དང་བཀྲས་མཐོང་བསྟན་འཛིན་རྣམ་རྒྱལ། བཀྲ་ཤིས་དབང་འདུས་བཅས་ཀྱི་མཚན་གཞུང་གསལ་བསྒྲགས་དང་འབྲེལ། ཁོང་གིས་འོས་བསྡུའི་ལས་རིམ་དང་འབྲེལ་གནད་དོན་དོན་ཁག་ཅིག་གི་ཐད་གསུངས་དོན། ཐེངས་འདིར་དབུས་འོས་བསྡུ་ལྷན་ཁང་གིས་བཀའ་ཁྲིའི་དངོས་གཞིའི་འོས་མི་གསལ་བསྒྲགས་མ་བྱས་སྔོན་ལ། བཀའ་ཁྲིའི་འོས་མི་གསུམ་གྱིས་སོ་སོ་དངོས་གཞིའི་འོས་མིར་བཞེངས་རྒྱུ་ཡིན་སྐོར་ཁྱབ་བསྒྲགས་བྱས་པ་དེ་ནི། འོས་བསྡུའི་སྒྲིག་གཞི་དང་འགལ་ཡོད། གལ་སྲིད་དབུས་འོས་བསྡུ་ལས་ཁུངས་ནས་དངོས་གཞིའི་འོས་མི་གཉིས་ལས་མི་ཉུང་བའི་སྒྲིག་གཞི་གཞིར་བཟུང་མི་གཅིག་ཕྱིར་འཐེན་བྱེད་ཆོག་གི་རེད། ཡིན་ནའང་། འོས་བསྡུ་ལྷན་ཁང་གི་ངོས་ནས་ཁོང་ཚོ་ཐོག་མ་ནས་བཀའ་ཁྲིའི་འོས་མིར་བཞེངས་ཡོད་པ་དེ་གཞི་རྩར་བཟུང་སྟེ་ཁོང་གསུམ་དངོས་གཞིའི་འོས་མིར་བཞག་པ་ཡིན། ཞེས་གསུངས་བྱུང་།

ཡང་ཁོང་གིས་བལ་ཡུལ་དང་འབྲུག་ཡུལ་གྱི་འོས་བསྡུའི་དཀའ་རྙོག་སྐོར་ལ་གསུངས་དོན། ང་ཚོས་ངོས་ནས་ཐེངས་འདིའི་འོས་བསྡུ་དང་འབྲེལ་བའི་བལ་འབྲུག་གཉིས་ཀྱི་གནས་ཆུལ་དེ། རྒྱལ་ཁབ་གཉིས་ཀྱི་གཞུང་དང་མི་མང་གི་ངོས་ནས་རྒྱ་མིས་ང་ཚོར་སྡང་སེམས་བྱས་པ་བཞིན་དམིགས་བསལ་སྡང་སེམས་བྱས་པ་ཞིག་ལ་ང་ཚོའི་ངོས་ནས་ངོས་འཛིན་བྱེད་ཀྱི་མེད། བལ་ཡུལ་ལ་མཚོན་ན། དཔལ་འབྱོར་གྱི་གནས་སྟངས་དང་ཆགས་ཡུལ་སོགས་ཕྱོགས་མང་པའི་ཐད་ནས་དུས་རབས་འདིའི་ནང་གནས་པ་ལ་རྒྱ་མི་དང་རྒྱ་གར་གཉིས་ལ་བསྟེན་དགོས་སྟབས། སྔོན་འགྲོའི་འོས་བསྡུའི་སྐབས་གནས་ཚུལ་དེ་འདྲ་ཞིག་ལྷག་པ་རེད། ད་ལྟའི་ཆར་བལ་འབྲུག་གཉིས་ཀྱི་དངོས་གཞིའི་ཐད་ཀྱི་གནས་ཚུལ་འདི་ཡིན་ཞེས་གསལ་བསྒྲགས་བྱེད་དཀའ་ཡང་། ང་ཚོས་ངོས་ནས་སྔོན་འགྲོའི་འོས་བསྡུའི་སྐབས་སུ་ཐབས་ཤེས་འདྲ་མིན་བྱས་པ་ཡིན་ལ། དངོས་གཞིར་ཡང་ཐབས་ཤེས་བྱ་རྒྱུ་ཡིན། ད་ལྟའི་འོས་གཞིའི་སྒྲིག་གཞིའི་ནང་མི་གསལ་བའི་རིགས་ང་ཚོ་འོས་བསྡུ་ལས་ཁུངས་ཀྱིས་ལག་ལེན་བསྟར་དགོས་ཀྱིན་ཡོད་ན། བོད་མི་མང་སྤྱི་འཐུས་ལྷན་ཚོགས་ལ་བཀའ་འཁྲོལ་ཞུ་དགོས་པ་རེད། ང་ཚོས་འཆར་གཞི་མང་པོ་ཞིག་སྤྱི་འཐུས་ལྷན་ཚོགས་ལ་ཕུལ་ཡོད་པའི་ཁྲོད་ཀྱི་ཁག་ཅིག་ལ་བཀའ་ལན་ཕེབས་ཡོད་ཀྱང་། ཁག་ཅིག་ཕེབས་ཡོང་རྒྱུར་སྒུག་བསྡད་ཡོད། ད་ཆར་ང་ཚོར་བལ་འབྲུག་གཉིས་ལ་དམིགས་བསལ་འགྲོ་སྟངས་འདི་ཡིན་ཟེར་བ་ཞིག་བཤད་རྒྱུ་མེད། ཅེས་གསུངས་བྱུང་།

ཐེངས་འདིའི་བཀའ་སྤྱི་གཉིས་ཀྱི་སྔོན་འགྲོའི་འོས་བསྡུའི་ཁྲོད་དེབ་སྐྱེལ་ཟིན་པའི་མི་ ༧༩༤༤༩ དང་འོས་བསྡུའི་ཆ་ཤས་ལེན་མཁན་གྱི་མི་ ༤༧༩༩༨ བྱུང་ཡོད་ལ། དེ་ནི་སྐབས་སྔོན་མ་དང་བསྡུར་ན་མི་ ༦༦༧༨ ཙམ་ཇེ་མང་དུ་ཕྱིན་ཡོད་འདུག ཉེ་བའི་ཆར་གོ་སྐབས་གཉིས་པ་སྤྲད་རྗེས་བཞུགས་སྒར་ཁུལ་དུ་བོད་མི་ ༡༢༠༠ ལྷག་དེབ་སྐྱེལ་བྱས་ཡོད་འདུག་ལ། ཟླ་འདིའི་ཕྱིེ་ཚེས་ ༢༤ བར་ད་དུང་ཕྱོགས་མཐའ་ཁག་དང་ཁྱོན་བསྡོམས་མི་ ༥༠༠༠ ལྷག་གིས་དེབ་སྐྱེལ་ཡོང་བའི་ཚོད་དཔག་བྱེད་ཀྱིན་ཡོད་འདུག

གསར་འགོད་པ། དོན་གོ